【贏在起跑線上】鋼琴導師呻3歲幼兒難受教 網民揶揄家長拔苗助長 「3歲應要識同莫札特通靈」

不少家長為子女安排形形色色的興趣班，以培養多方面才能，但「贏在起跑線上」孰好孰壞？有鋼琴導師日前在網上發帖，表示一名只有3歲的學生由於年紀尚幼，上堂難以聽從指令，即使已經學會認拍子和音符，也「無法正常彈到一段仔」曲譜，遂在請教其他導師的教學方法，卻引發網民熱議。

「想問吓點教3歲BB鋼琴？」Facebook專頁「樂器·補習導師Secrets」昨日（21日）刊登一名鋼琴導師投稿。事主指受家長所託，教導一名只有3歲的小朋友彈鋼琴；雖然上堂時利用多款教具，成功令學生學會拍子和音符，惟每當要求「實戰」彈琴，對方就因聽不懂指令，至今仍「無法正常彈到一段仔」曲譜，令教學進度落後。

他表示，既然自己已經嘗試過許多教學方法，結果學生只會認音符和拍子而不會彈琴，坦言家長倒不如帶子女上幼兒音樂班，

「上堂如果用太多時間用教具，又冇時間教佢彈，佢之後識拍子認音但如唔識彈，咁不如去啲幼兒音樂班個啲仲好？」

網民揶揄家長拔苗助長

帖文隨即引起網民熱烈討論，不少人均指要3歲幼兒學習彈琴是強人所難，恐怕只會適得其反，「3歲手指都未夠力啦，盞彈壞手型」。有網民又指若「夾硬嚟」要小朋友學琴，恐怕有機會令小朋友失去學音樂的興趣，「逼佢只會令佢討厭樂器同你」、「B學又辛苦，老師教又辛苦，家長又何必咁樣做呢」。

此外，有不少網民笑言現今的小朋友均是「天才兒童」，揶揄部分家長不顧子女的學習程度，拔苗助長，戲稱：「3歲彈唔到琴真係好差，不過我聽過3歲讀唔到博士，呢個就真係好差。」、「其實3歲應該要學識同Mozart（莫札特）同Bach（巴哈）通靈㗎啦，如果唔係點同音樂溝通到？！」、「我識得啲朋友嘅仔女喺阿媽個肚嗰陣已經學緊啦！」、「3歲要攞諾貝爾啦，仲學琴？」、「音樂嘅嘢，授精卵階段就要教啦。」

1歲兒拒食固體食物逾一周，港媽斷奶強迫自主進食，「狗都可能易教過佢」，詳情即睇：【下一頁】

每朝索取《晴報》：精明生活．健康家庭．開心娛樂

撰文：黎穎芯