台灣藝人蔣萍日前喺一個生活資訊綜合節目上，爆出當年同自己咗結婚7年嘅老公背住佢出軌，而偷食對象竟然係佢嘅媽媽！
（蔣萍Facebook）
蔣萍21歲時不理家人反對，同大佢14年、當時35歲嘅男友結婚，不過二人嘅婚姻最終不敵7年之癢。蔣萍做編劇嘅老公因為工作不順，婚姻後期多咗時間留喺屋企，增加咗老公同岳母相處嘅機會。蔣萍一直都冇懷疑老公，直到有一個識紫微斗數嘅新女鄰居搬嚟，好心幫蔣萍一家睇命盤，暗地裏邀請蔣萍翌日再詳談，然後同佢講佢丈夫有外遇至少已半年。風水師更煞有介事指呢個人係佢都認識：「現在這個人在枱下，她看到你，你看不到她，3個月後她就會慢慢浮上枱面，你就會知道她是誰，你根本不用問。」
（蔣萍Facebook）
蔣萍發覺老公生活習慣有變，不停追問老公係咪外遇，結果有一次老公鬼拍後尾枕爆出一句：「我一次可以搞定你們母女兩個。」蔣萍聽到之後驚訝反問：「你剛剛說的是我媽媽嗎？」立刻致電媽媽對質，媽媽聽完之後即刻Cut線，蔣萍怒衝往父母家，媽媽開門見到係佢立刻將門關上，蔣萍當刻忍唔住喊。後來爸爸開門問蔣萍咩事，蔣萍當時冇同爸爸講，只係喊住離開。
（蔣萍Facebook）
蔣萍指媽媽從來冇解釋，其前夫透露，岳母手腳經常酸痛，佢為對方按摩而展開呢段不倫戀。前夫指佢不經意掂到岳母「私密部位」岳母都冇反抗，兩人自然就發生咗關係。更恐怖嘅係前夫床戰佢媽媽嘅時候，佢同囝囝都喺屋企:「我帶小孩在外面看電視，然後餵他吃飯。」佢當時完全冇諗到會發生呢種事。蔣萍指事後老公仍狡辯係岳母挑逗佢，如果佢冇「偷食」岳母，岳母都會搵其他男人。
（蔣萍Facebook）
蔣萍要求離婚，開始時老公唔願意放人，最終老公願意簽字離婚，但堅持要阿仔嘅監護權，但又畀自己嘅父母湊，令阿仔不斷被爺爺嫲嫲洗腦「你媽媽不要你」，有段時間阿仔跟媽媽生活，更開始變得叛逆。不過長大後阿仔亦開始懂事，離婚20年來，前夫無數次想復合，阿仔卻「勸分不勸和」，指爸爸太花心，唔值得媽媽回頭。
（蔣萍Facebook）
事後蔣萍媽媽同佢前夫再冇聯絡，媽媽亦再同其他男人一齊，因為對方係有婦之夫，對方老婆打電話去屋企搵媽媽，爸爸先知道老婆一直有外遇。蔣萍爸爸原本對佢離婚一直唔諒解，事後先知係因為是媽媽。蔣萍父母後來亦分咗居，但一直冇辦離婚。
蔣萍父親（左）與蔣萍關係良好。（蔣萍Facebook）
蔣萍透露至今都冇同母親講過嘢，僅於外公喪禮、弟弟婚禮上碰過面，媽媽默默幫佢着孝服時，母女二人始終沉默不語。蔣萍過去10年深感自責，認為如果佢冇同前夫結婚，就唔會發生呢件事。如今蔣萍選擇放下，試圖搵機會同媽媽解開心結，唔希望留下遺憾：「畢竟她是生我的人。」
（蔣萍Facebook）
撰文：黃蘊姿