從「廢柴」聲中成長 張繼聰唔再Care被嘲食軟飯

張繼聰日前與王梓軒開IG直播，暢談音樂與人生，踏入男人四十的阿聰，重提當年被嘲「廢柴」、「軟飯王」等，他坦言多年來受過的惡言，令他磨練成長，現在已懂得調節心態，不再介意惡言，學識好好享受中佬生活。

王梓軒與張繼聰相識十年，二人在網上直播中大談人生，梓軒大讚阿聰新歌《David Harleyson》非常有型！40歲的阿聰笑言新歌是中佬的浪漫：「我仲有後生嗰種心態，做呢隻歌係因為近期好鍾意玩古董電單車，人隨住年紀，喜好都唔同，以前我唔鍾意車，依家覺得古董車幾似我哋呢個年紀，target呢種中佬嘅心態。」

二人剛相識時經常傾心事，梓軒指當時阿聰心情低落兼壓力大，阿聰坦言受閒言影響：「呢啲難關我20幾歲遇唔少，好似撞鬼咁，有好多嘅抹黑！呢啲你無得解釋，真係影響好多人對你嘅睇法。」

嘆攞獎仍不受尊重

阿聰20多歲時結婚生B，由男孩變男人：「我係一個普通男仔，返工搵錢養小朋友，生活唔容易，仲要面對負面攻擊。點樣同人解釋『其實我有嘢做㗎！我唔係靠老婆㗎！我寫歌每個月都有收入！』但我無論寫幾多歌，攞創作人獎，都無人尊重。」

幸好阿聰後來已想通：「你哋覺得我係廢柴又好、食軟飯又好，乜標籤都無所謂，某程度嗰個唔係我，認識我嘅人只有我身邊嘅人，把口生喺人哋度，佢可以講任何嘢，我都可以揀認唔認同。」他自言現已學識調節心態，現在遇到負面事情，最多只嬲八分鐘。

撰文︰Pauline

編輯：李潔盈

美術：梁政敏