伊莉莎伯．福爾摩斯（Elizabeth Holmes），一個你可能覺得陌生嘅名字。但如果講「女版Steve Job」，可能會喚起你對佢嘅印象。2003年，只有19歲嘅佢輟學創立「Theranos」公司，並聲稱研發出只需用指尖少量血液就可以驗出各種疾病，包括癌症嘅儀器「Edison」；2020年嘅今日，伊莉莎伯因涉嫌欺詐而面臨刑事指控，而佢試圖以精神有問題作辯解。呢場好似電影一樣嘅騙局，睇嚟有排都未落幕。
想了解成件事嘅來龍去脈，要由佢19歲講起。當時仲係史丹福大學化工系一年級生嘅伊莉莎伯，喺新加坡實習時覺得用針筒搜集血液樣本檢驗SARS病毒太落後，竟然提出「微量血液檢測」，宣稱佢嘅技術只要喺指尖輕輕拮一滴血，就可以無痛檢驗疾病。而當時嘅工程學院院長Channing Robertson竟然俾佢說服到。之後佢輟學用自己嘅教育基金成立咗「Theranos」，Robertson院長就係佢公司第一位董事。
伊莉莎伯能言善辯，明明無任何實質技術，單憑個人魅力同一份26頁嘅計劃書，喺2010年已經籌到超過9,200萬美元資金。而且投資嘅人個個有頭有面，包括美國前國務卿George Shultz、美國甲骨文公司共同創辦人Larry Ellison、媒體大亨Rupert Murdoch，同埋克林頓政府及特朗普政府嘅兩名國防部長等等。
▲憑佢嘅能言善辯，伊莉莎伯呃到好多有份量嘅人物投資喺Theranos。（來源：互聯網）
用「金玉其外，敗絮其中」嚟形容伊莉莎伯嘅公司實在非常貼切，佢不停燒銀紙，但所謂儀器根本係廢嘅，於是佢開始用假數據、假機器瞞天過海。最可笑係傳媒仲不停吹捧呢個「世紀大老千」，稱佢為矽谷「明日之星」、「女版Steve Job」，2015年甚至入選《時代雜誌》「2015年最具影響力的百大人物」，身家更一度高達45億美元，打入福布斯年輕富豪榜。直至《華爾街日報》記者John Carreyrou接到爆料，再經多番調查，《華爾街日報》最終以頭條踢爆咗Theranos嘅驚天大騙局，一連幾日嘅報道，令Theranos 90億美元嘅市值瞬間蒸發。
▲當時嘅傳媒一窩蜂地吹捧伊莉莎伯。（來源：互聯網）
2018年，Theranos宣告破產，伊莉莎伯亦面對緊多項刑事控罪。近日佢又出新招，向法院呈交證據，證明自己患上「精神疾病或缺陷」同出現「與罪惡感有關」嘅其他精神狀況，希望藉此證明自己並非故意違法。佢原本想用自己建議嘅心理學家提供嘅證據，但俾法院拒絕，最終喺9月9日裁定，伊莉莎伯只可接受政府專家診斷。睇嚟一向滿口大話嘅佢，今次嘅如意算盤未必打得響。
▲踢爆騙局嘅記者John Carreyrou將成件事嘅前因後果都寫晒喺著作《Bad Blood》入面。（來源：互聯網）
踢爆呢個世紀大騙局嘅記者John Carreyrou根據呢件事完成咗著作《Bad Blood: Secrets and Lies in a Silicon Valley Startup》，報道晒成件事嘅前因後果。而喺網上可以搵到呢本書嘅audio版：www.youtube.com/watch?v=74DWCqYY3sQ。
撰文：何本輝
接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/