【聲明】港生活網站並無進行電話推廣活動

變髮術後生廿年 薛家燕粒癦唔見咗

發佈時間: 2020/09/25

薛家燕今年首次推出自家品牌「家燕媽媽流心奶黃月餅」,適逢中秋將至,她日前現身商場展銷攤位,吸引大批粉絲掃貨兼合照。家燕姐換上新髮型示人,她笑指遮蓋了粒癦:「後生咗、有新鮮感。」

家燕姐日前出席《皆大歡喜慶中秋!》商場活動,做「生招牌」密密促銷,獲不少粉絲攜同兒孫捧場,溫情洋溢,而且生意額不俗。家燕姐表示:「我好耐無出去商場行喇,我諗都有大半年,今日嚟到好開心,見到好多朋友到場支持,中秋節係一個佳節,希望我嘅月餅,大家食得開開心心!」

平日忙於主持《流行經典50年》的家燕姐,當日以新髮型亮相,看來年輕廿年,令人眼前一亮。她笑謂︰「呢個新髮型係咪好特別呢?其實想換下形象,頭先行出嚟,好多fans都唔係好認得我,因為唔見咗粒癦,我覺得呢個新髮型後生咗、有新鮮感。」

希望大女返港團圓

提到今年中秋節受限聚令影響,家燕姐預計在屋企大排筵席,她續稱:「唔使我下廚,因為我細女(石耀珠)依家煮飯好叻,仲有我新抱,呢個疫情佢哋日日都買餸煮飯,好好味!喺屋企食都好開心,或者食完飯食埋月餅,之後上山頂賞月。我希望大女珊珊(石祐珊)可以從美國趕返嚟,不過返嚟都要隔離14日。」

撰文︰Pauline

編輯:陳禮恒

美術:梁政敏

變髮術後生廿年 薛家燕粒癦唔見咗

薛家燕每次都穿上靚衫主持《流行經典50年》,額上粒癦更成為她的標記。(資料圖片)