【聲明】港生活網站並無進行電話推廣活動

曾詐病自毀星途 車保羅欠菲籍老婆一個婚禮

發佈時間: 2020/09/25

60歲的車保羅近年偶有亮相幕前,早前他接受苑瓊丹主持的《開工大吉77》訪問時,罕有地大談家庭,他對菲籍妻子一往情深,更揚言欠太太一個盛大婚禮。

車保羅78年與首任太太熊愛蘭奉子成婚,婚後育有女兒吳茵茵,但婚姻僅維持了兩年;直至92年,他跟曾是其菲傭的Inday結婚,兩人育有一子吳卓偉,兒子同樣迎娶菲籍女友,並誕下一子。車保羅閒時弄孫為樂,他表示︰「睇見個孫簡直開心到暈!」

日前車保羅接受苑瓊丹訪問,他大方提及菲籍妻子︰「當年我搵佢做鐘點執屋,啲錢周圍擺,佢就提醒我收好啲錢,我覺得呢個女人唔簡單,開始試下佢,發現啲錢無少到,我對佢開始動心。後期我經濟唔好,周圍問人借錢,佢幫我記低借咗邊個錢,要還畀邊個,所以到今時今日,我都爭佢一個盛大婚禮。」

車保羅近年甚少現身幕前,原來他已轉行做街市監督。他坦言︰「依家返工要着制服、穿反光衣,唔可以亂咁請假。其實都無咩尷尬,要做咪做囉,由細到大都做過好多行。」他憶述在圈中最風光時期,每日現身不同劇組,但因賭博而失去所有︰「當年我大概風光咗十年,真係忙到去銀行入錢都無時間,不過當年我賭錢,無做咩投資,最終咩都輸晒。」

瞞亞視秘撈拍戲

提到當年經歷事業危機,皆因隱瞞公司「秘撈」拍戲,他憶述︰「當年有人搵我拍戲,咁我就呃公司『生疱疹』,要去北京醫病,公司梗係畀我走啦!到我拍完返香港,葉蒨文喺機場話剛剛同亞視嘅車保羅拍戲,咁就成件事穿晒,最終都要返公司認錯,被人扣一個月糧。」

撰文︰倪小珊

編輯︰陳禮恒

美術︰Simon

曾詐病自毀星途 車保羅欠菲籍老婆一個婚禮

車保羅與太太(右)、兒子及新抱影全家福。(FB圖片)