【聲明】港生活網站並無進行電話推廣活動

睇好馬國明下個做老竇 黎諾懿向林峯傳授湊B心得

發佈時間: 2020/09/28

林峯前日宣布榮升爸爸,太太張馨月誕下小公主,二人更公開「豬八戒與孫悟空」搞笑孕照報喜。林峯好友黎諾懿前晚出席《星光熠熠耀保良》直播,特別向老友傳授湊B心得,提醒林峯記得爭取瞓覺時間。

黎諾懿前晚提到林峯初為人父時,非常戥對方開心。諾懿說:「好開心,我哋『奧運六星』多一個人加入爸爸行列,因為依家得我同林峯結咗婚、生咗小朋友,其他人要急起直追喇,我估下一個係馬國明。希望阿峯嘅BB快高長大、健健康康。」諾懿教路林峯要有耐性湊B:「有得瞓就好瞓,不過我諗阿峯都無覺好瞓。小春雞(諾懿兒子)出世頭十日,我曾經有幻聽,好似成日聽到佢喊,後來外父外母幫手湊先好啲。」他寄語林峯湊B不用太緊張:「小朋友大得好快,雖然湊B好辛苦,但好好享受呢個過程。」

另外,諾懿前晚在節目中為吞嚥困難人士炮製菜膽雞,他自爆早前做《疫境廚神》直播時失手:「我煎燶咗少少豬扒,算係幾嚴重嘅過失,不過我爛船都有三斤釘,補救得到。成日咁完美無人睇㗎,有少少缺陷先好睇,點擊率先高。」提到太太曾投訴他的擺盤不夠吸引,他笑指現時已用貴價食材擺盤:「番茄要百幾蚊,青檸都30蚊一粒,好彩公司畀錢,否則我好肉痛,依家用擺盤去彌補廚藝不足。」

謝嘉怡否認被孤立

另外,同場的應屆港姐三甲謝嘉怡、陳楨怡及郭柏妍前晚以低胸晚裝亮相。謝嘉怡當選不久即有廣告拍,有指她工作量比其他佳麗多,因而遭孤立,連一班港姐買飲品,她也獨自企開。謝嘉怡否認傳聞說:「當時我企喺一邊覆WhatsApp啫。我哋感情好好,成日約行街,我就快搬屋,佢哋都會陪我買傢俬。」

撰文︰ Pauline

編輯:李潔盈

美術:梁政敏

睇好馬國明下個做老竇 黎諾懿向林峯傳授湊B心得

黎諾懿笑言湊仔辛苦,但見證小朋友成長相當值得。

睇好馬國明下個做老竇 黎諾懿向林峯傳授湊B心得

(左起)郭柏妍、謝嘉怡及陳楨怡以無綫台徽的三色晚裝亮相。