近日《C9特工》熱播，不少觀眾的焦點除了是連播四劇的女主角高海寧之外，男主角馬國明的「深情賣菜佬」亦搶了不少分數，不少觀眾都大讚馬明的角色造型夠貼地，經常白色小背心上陣夠晒「吸晴」，加上角色對「特工老婆」情深一片，有網民甚至問馬明有沒有機會「冧莊」視帝。
早前無綫決定抽起《唐人街》改播《C9特工》時，不少網民都問了同一個問題：「又係高海寧？」，所以當時不少人都對《C9特工》沒有太大期望，直至劇集播出一個星期後，都因為馬明這個「情深賣菜佬」而改觀，紛紛大讚小品都非常不錯。
對於劇集受觀眾歡迎，馬國明接受《晴報》訪問時表示，他只要有空都會陪媽媽去街市，所以對賣菜哥哥有一定認知，「其實我平時都會去街市，見唔少賣菜哥哥，所以唔需要刻意去設計角色，而且依家好多街市都有冷氣，所以我個造型唔需要好爛撻撻。」馬明又表示這次拍《C9》很開心，因為嚴格來說這次是跟黎諾懿首次真正合作，大家有很多對手戲，馬明更大爆黎諾懿非常妒忌自己，「跟諾懿拍劇真的很開心，我跟他每次走在一起都會玩個不停，跟你說個小秘密，他很妒忌我在劇中的角色，因為我們拍攝的時候是夏天，他很妒忌我可以穿得很簡單，而他就每次都要著到好型咁chok晒樣，其實佢好熱好辛苦。」至於問到今年「視帝」，馬明就說獎項一直都是隨緣，最緊要是享受拍攝過程。
馬明嘅小背心又真係幾吸晴。（劇集劇照）
深情嘅男人雖然老土，但最緊要係觀眾受。（劇集劇照）
當劇情去到中後段，馬明再唔係一個普通賣菜佬咁簡單。（劇集劇照）
不少討論區網友都大讚馬明做得唔錯。（網上截圖）
過往都有不少藝人曾演繹街市草根的角色，大家數得幾多位？
《七十三》 賣魚勝（陳劍雲飾）
電視劇《七十三》中的「賣魚勝」，由陳劍雲飾演，完全是當年經典草根人物，個性衝動、聲大夾惡但又不失善良個性，當年受歡迎程度，從《香港八一》都有「亂入」呢個角色，可見如何深入民心。
（網上圖片）
除咗「賣魚勝」之外，「盲俠花滿樓」都係陳劍雲經典角色之一。（片段截圖）
《街市的童話》王夏伯（羅嘉良飾）
這套由羅嘉良主演的《街市的童話》，06年放在中午時段播放，當年雖然被視為倉底貨，不過貴為視帝的羅嘉良，在劇中飾演善良正直的「菜二代」有情有義，深得不少街市常客的師奶劇迷歡心，絕對是他罕有的滄海遺珠作品。
（片段截圖）
《國產凌凌漆》凌凌漆（周星馳飾）
星爺26年前的「凌凌漆」絕對是他最經典的角色之一，一個欷歔又鹹濕的豬肉佬、一杯「Dry Martini」、一手神乎其技的刀法，即使已是26前的作品，但仍然是星爺迷「翻看再翻看」的熱門之選。
「你啲咁出色嘅男人，無論喺邊度，就好似漆黑中嘅螢火蟲一樣，咁鮮明，咁出眾。你憂鬱嘅眼神，欷歔嘅鬚根，神乎其技嘅刀法，同埋嗰杯Dry Martini，都徹底咁將你出賣咗。」（電影劇照）
《每當變幻時》魚佬（陳奕迅）
陳奕迅於2007年的電影作品，戲中他飾演表面上是街市惡霸的魚佬，其實一直對街市有情有義，為了拯救街市而扭盡六壬。戲中陳奕迅將賣魚佬的街市那種「義氣仔女」的性格表露無遺。
（電影劇照）
真實街市佬 「小背心」李彩華
由於與女星李彩華「撞名」，本身是「香港海鮮業聯合總會主席」的李彩華，當年一段穿上白背心的訪問新聞片段，被網民惡搞為「李彩華小背心圖」，不少網民都中過伏，而這個名詞更成為日後在網上「中伏」的新興代名詞。
「李彩華小背心圖」……你有冇中過伏？（網上圖片）
（李彩華提供）
撰文：倪少軒