【聲明】港生活網站並無進行電話推廣活動

中秋節各有各忙 馬國明無得同靚湯團圓

發佈時間: 2020/09/29

馬國明與湯洛雯(靚湯)認愛後經常放閃,本周四將度過拍拖後首個中秋節。雖然他們各有工作,未能「人月兩團圓」,不過馬明已買定月餅孝敬未來外父、外母,相當識做。

馬國明昨日孖高海寧(高Ling)及黎諾懿等宣傳新劇《C9特工》,馬明為宣傳劇集,日前在IG上載與劇中老婆高Ling的劇照放閃,更留言「好愛Cute媽(高Ling)」,此舉引來馬明正印女友湯洛雯呷醋,留言「喊喊」表情符號示威。馬明昨日笑說:「佢(靚湯)無呷醋,只係玩下,佢公私分明。」會否私下跟女友講「好愛湯洛雯」補番數?他笑說:「唔話你聽!」

周四便是中秋節,馬明直言與靚湯當日各有工作,未能「人月兩團圓」:「阿湯要拍電影,我拍緊《兒科醫生》要趕進度,分咗AB組拍攝,不過我買咗月餅送畀Uncle同Auntie(靚湯父母),的確好老套,但我真係諗唔到送乜,哈哈!」他慶幸疫情下仍可劇接劇,不用被裁員或減薪,提到他「有工開、有女友」是人生勝利組?他即說:「唔係,大把人勝利過我,黎諾懿都比我勝利,我好妒忌佢。」

黎諾懿驚小春雞返學唔適應

同場的黎諾懿透露囝囝「小春雞」今日開學,他笑言早前試堂時,兒子未入校門已嚷着要走,所以十分擔心囝囝不適應。他說:「小春雞之前返預備班都喊咗好耐,希望今次一星期就適應到,我聽日(今日)會同佢講『放學買玩具』,順便當中秋節禮物。」

採訪︰Pauline

攝影︰林良明

編輯:李潔盈

美術:梁政敏

中秋節各有各忙 馬國明無得同靚湯團圓

馬國明在社交網Po相向劇中老婆高海寧「示愛」。(IG圖片)

中秋節各有各忙 馬國明無得同靚湯團圓

黎諾懿擔心兒子上學時扭計。