【聲明】港生活網站並無進行電話推廣活動

太古地產義賣可重用口罩 款式時尚可調校

發佈時間: 2020/09/30

黛安一向都貪靚,戴咗傳統口罩咁耐,都想間中換下花樣,襯下靚衫。如果扮靚之餘仲可以做埋慈善,就最好不過。最近聽到公關姊妹推薦太古地產社區關懷基金嘅「婦女展才」可重用口罩,話呢款口罩夠時尚,而且係慈善義賣,真係好有意思。

公關姊妹畀相黛安睇,啲口罩顏色真係幾吸引,有櫻桃紅、珍珠粉、蔚藍、薰衣草4款,可以輕鬆配搭日常造型,除咗提供M、L、XL尺碼供選擇外,亦加入咗可調校鬆緊嘅設計,照顧唔同人士嘅需要。口罩唔係得個靚字,更加入濾芯增加保護性㖭。

黛安了解過,呢啲口罩係由7間社福機構,集合80位婦女製作,3萬個口罩就係由佢哋親手用針綫縫製而成,畀佢哋一展所長之餘,同時為佢哋提供經濟收入。現時口罩連口罩袋做緊義賣,套裝價只售$88,大家真係要支持下!姊妹仲話,口罩袋可以加錢將英文名刺繡上去,每個字母只需$5,手工製造,送畀朋友更顯得有心思。大家可經網購,或到香港海事博物館禮品店等選購。

太古地產義賣可重用口罩 款式時尚可調校

慈善口罩套上,可以刺繡英文名上去,每個字母只需$5。

撰文: 黛安 消息特靈八卦公關
欄名: 八卦名利場