【聲明】港生活網站並無進行電話推廣活動

唔鼓勵囡囡化粧 林嘉欣同大女撈亂衫着

發佈時間: 2020/09/30

林嘉欣昨午到尖沙咀出席時尚戶外品牌活動,育有兩名囡囡的她,透露十歲大女身高已到其鼻樑位置,兩母女可以把衣服互穿。問到女兒可有借用她的化粧品?嘉欣笑指︰「唔好咁快住!」

林嘉欣昨日一身「女神行山裝」亮相,熱愛行山的她,在台上透露為免令兩個女兒太依賴城市生活,故經常一家四口行山,讓她們發掘大自然的美好。嘉欣又稱︰「我哋仲會去沙灘執垃圾,佢哋都無話驚污糟,因為要保護香港嘅靚景。」至於中秋節可會一家人行山?她笑言︰「連續四日假,個個都去行山,我反而想留喺屋企食月餅。」

金像獎延期 戥導演老公不值

提到兩位女兒正式返學,大女讀四年級,細女升二年級,嘉欣表示不會再為她們執書包,她認為:「執漏咗下次就會知道,要畀返啲經驗佢哋學習。」嘉欣又透露兩位女兒已長高不少,大女身高已到其鼻樑,穿38.5號鞋,「佢已經可以着我啲衫同鞋。(借埋你啲化粧品扮靚?)無呀,我啲囡囡比較運動型,雖然阿妹貪靚啲,但都係偏向運動型,佢鍾意側手翻同打筋斛。(未貪靚住?)係呀,唔好咁快住,佢哋貪靚都無乜嘢,因為我喺屋企唔會化粧,得唇膏同遮瑕膏,比較素顏,好少化粧品。」

林嘉欣在電影《死因無可疑》的演出獲讚賞,影片由老公袁劍偉執導,對於金像獎決定延至2022年才舉行,問嘉欣可會覺得等太耐?她無奈表示︰「我諗金像獎應該左度右度,諗咗好耐先有呢個結論,咁我梗係尊重大會啦!」今年九月前僅得十多部電影上映,嘉欣直言︰「唔夠多戲。(兩年合併令更多電影爭獎?)無話蝕唔蝕嘅,個初衷都冇變,唔關有冇獎或提名。佢(老公)就慘啲囉,我係演員可以咁放任,但佢放嘅時間比較耐,我都問佢『你ok嘛?』,佢話尊重大會,係無辦法之中嘅辦法。」

撰文︰倪小珊

編輯︰陳禮恒

美術︰梁政敏

唔鼓勵囡囡化粧 林嘉欣同大女撈亂衫着

嘉欣喜歡一家大細去行山、游水等戶外活動。(IG圖片)