【于洋急通波仔保命】劉江入TVB 30幾年來從沒推劇 內疚當年沒勸告陳鴻烈停工休息

74歲的劉江和快滿72歲的于洋近日接受香港電台《一起走過》訪問，兩位前輩跟主持人楊紹鴻和江美儀老友鬼鬼，在節目分享當年拍劇的回憶，楊紹鴻大爆于洋非常有個性，拍攝無綫劇集《鬼咁夠運》時，因與無綫合約完結，他即時決定不續約離開，最後五日的戲份都未完成就走，連江美儀都大讚「有型」。于洋表示：「夠鐘咪走囉，兩個禮拜前講咗啦，你唔同我傾就走，（當時點解要走？）公司太硬淨，我年少意氣用事，後來都有完成，不過5日戲就3日內拍完，5000蚊一日，臨走仲鑿返筆先走。」而于洋被踢爆原來他曾被邀請演出電影《叔‧叔》中的主角之一，跟太保飾演一對，後來楊紹鴻認為接戲最重要是接受，若不接受這回事的話，很難演得好，最終角色由袁富華頂上，更獲得多個獎項肯定。

【效力無綫37年】劉江分享曾疑中風半邊身唔郁得 到台學京劇憾未能見父最後一面【下一頁】

{{hket:inline-image name="8273ba58-54eb-4b25-9c29-2dec435b5dd3.jpg"}}{{/hket:inline-image}}

(圖片：大會提供)

劉江剛剛離開TVB，他表示自己不會退休，他揚言：「我走嗰陣都同大家講江湖再見，（TVB叫你拍你拍唔拍？)拍，傾好咪拍囉，加入TVB 30多年來從來沒有推戲過，但唔會簽長約，我亦會有啲要求，大佬我74歲唔係47呀！」他直言自己年紀不輕，不會讓自己太過辛苦，劉江憶起老友陳鴻烈拍劇期間心臟病發猝死一事，難掩感慨之餘，亦直指于洋是十分幸運走過死門關。

2008年，于洋拍攝《少年四大名捕》演皇帝，而劉江演宰相蔡京，兩人在飯堂碰面，當時于洋大呻辛苦，劉江笑言：「佢好多戲，拍完收工夜晚11點幾，對白唔掂，又多對白，你噏來噏去成口泡咁，之後佢返屋企就覺得心口痛，搵個跌打師傅捽兩捽就算。」于洋表示事隔幾日再約朋友去飲茶，沒想到結帳心口不舒服，難以呼吸，於是即時送院兼立即接受「通波仔」手術保命。

【萬千星輝頒獎典禮】劉江突然宣布離巢有難言之隱？ 李天翔爆不被邀請：「意料之內」【下一頁】

而同一時期，劉江跟陳鴻烈拍攝《畢打自己人》，經常聽聞對方拍攝辛苦的怨言，他說：「我同佢一齊開工，我換好衫，佢同黎耀祥拗套衫使唔使連戲，咁我就話你兩仔爺拗掂佢先，我入會議室坐坐先，後來工作人員走埋嚟同我講，話烈哥呢輪辛苦，佢想飲啖水唞唞先再入廠，我當然明白體諒，因為拍緊兩套戲又台慶，佢都真係好緊張。後來，工作人員再入嚟就已經話佢唔得喇！」

劉江憶起當時《畢打自己人》時，烈哥不時會問為何這一集沒有自己份，他起初都難明烈哥的進取，他說：「烈哥話同我唔同，自己化骨龍仲係好細，咁家家有本難念的經，我幾集出一出，佢差不多集集都有份。台慶當晚佢又要現場唱歌跳舞，佢喺我前面，大家傾偈，烈哥話好辛苦，綵排完仲要出外景，我當時心諗，冇又話冇戲，有又嫌辛苦，不過我當然冇當面講。我而家有時諗返起件事個心都好唔舒服，怪自己點解唔同佢講吓叫佢唞吓呢？」劉江回憶起這些畫面，都難免心痛，但奈何不知道他有不適，他說：「人人問離開TVB最懷念係咩，我都答係佢，我同佢拍《畢打自己人》同《同事三分親》，有佢喺度啲戲真係好好睇，我哋兩個之間嘅化學作用好睇，之前重播我特別自己再睇，真係冇得頂，就算而家再做，對手唔係佢，我自己都做唔返。」

責任編輯：楊安莉