【聲明】港生活網站並無進行電話推廣活動

大堆海味金器過大禮 何雁詩感謝鄭俊弘落重本

發佈時間: 2020/10/06

鄭俊弘(Fred)與何雁詩將於下月7日在港註冊結婚,前日二人過大禮,Fred跟足傳統儀式,更「落重本」送上大堆參茸海味及金器,令未來外父外母笑逐顏開。何雁詩昨日亦找來未婚夫擔任新歌MV男主角,更大爆兩人有「床戲」。

何雁詩昨日為自資五位數字製作的新歌《基本戀愛套路》拍攝MV,她笑言歌曲是送給未婚夫鄭俊弘的禮物,所以專程找Fred任MV男主角。何雁詩笑說︰「首歌係送畀佢,無理由搵第二個男人做男主角。MV主要拍我哋喺屋企嘅甜蜜生活,會有親密鏡頭,亦有喺床上拍嘅『床戲』。(Fred唔收酬勞?)象徵式畀八蚊佢囉!」

提到前日過大禮,何雁詩表示過程順利,Fred找來何雁詩的好姊妹陳瀅、蔡思貝及賴慰玲等幫手,將參茸海味、椰子、嫁女餅及金器等送到女家,氣氛相當熱鬧。可有計算金器總值幾多錢?何雁詩表示不太清楚,但她很多謝Fred「落重本」,還透露收了三對龍鳳鈪及兩條金鏈。

延至明年擺酒

何雁詩大爆過大禮期間,一眾好姊妹由「一姐」變身臨時演員。何雁詩說︰「佢哋聽大衿姐話要歡呼同拍掌,做到好足。蔡思貝最出色,佢份人一向好感性,我諗到正式婚禮時佢都會爆喊,到時獎個飯盒畀佢。」受限聚令影響,兩人決定延至明年才擺酒,而下月7日只會註冊,但亦會做足接新娘儀式。

問Fred過大禮一共花了多少錢?他說︰「唔記得喇,最緊要大家開心,開心就唔肉赤。」身旁的何雁詩則踢爆︰「我爸爸最開心,佢全日都攬住Fred,直情睇我唔到。」

採訪︰Pauline

撰文︰倪小珊

編輯︰李潔盈

美術︰梁政敏

大堆海味金器過大禮 何雁詩感謝鄭俊弘落重本

陳瀅(左一)、賴慰玲(右二)及蔡思貝(右一)專程協助鄭俊弘過大禮。

大堆海味金器過大禮 何雁詩感謝鄭俊弘落重本

何雁詩與鄭俊弘完成儀式後甜蜜咀嘴。