女友梁諾妍4小時41分跑畢馬拉松 洪永城送抱︰佢約我下次一齊跑

洪永城（Tony）女友梁諾妍（Inez）前日在港完成「倫敦虛擬馬拉松」，跑畢全程約42公里，並獲大會頒發證書。Tony在終點拍片捕捉女友完成馬拉松一刻，更即時送上愛的抱抱。昨午Tony接受《晴報》訪問，他透露有意情侶檔上陣︰「佢話下次一齊跑，自己最多跑到半馬拉松，希望明年成事！」

由於新冠肺炎疫情持續肆虐全球，今年世界各地的馬拉松也被迫延期或取消，取而代之是新興的虛擬馬拉松（Virtual Run），各地跑手可以留在自己所屬地區完成賽事。洪永城女友梁諾妍一向是運動狂熱分子，她在個半月前報名參加「倫敦虛擬馬拉松」，雖然準備時間倉卒，但她前日在港島區順利以4小時41分26秒完成全馬，Tony更在終點迎接女友「衝綫」，大讚她是super woman。

事後Inez在IG發文指上周四開始為了加碳（儲能量），吃得太多連續多日肚屙，並點名感謝男友Tony幫忙拍攝及駕車載她回家。

昨午Tony向《晴報》大談女友成功跑畢全馬，他表示︰「佢係一個長跑教練，不嬲都有跑開，過往曾參與世界各地包括東京、烏茲別克馬拉松，今次因為天氣比較熱，佢跑完都跛下跛下，對腳仲起晒水泡又抽筋！」對於如何協助及鼓勵Inez出賽，Tony續稱︰「佢本身有陪跑員幫手，所以我主要負責照顧佢嘅起居飲食，因為佢為咗賽事要做『飯桶』，幾日食十幾廿碗飯，我就負責買餸、放狗，等佢專心應戰！」他又透露女友完成馬拉松後，前晚特別請她歎日本菜作慰勞。

拍拖練跑要女友遷就

問及是否經常陪女友練跑，Tony透露︰「佢五分鐘跑到一公里，我就要六分半鐘，所以佢平時練跑都好遷就我嘅速度，自覺都健康咗，疫情下在工作以外多咗個目標，希望畀到大家正能量，畀到目標自己！」Tony更大爆女友提議他們下次情侶檔上陣︰「我跑速唔及佢，自己耐力仲有進步空間，跑十公里佢又嫌太容易，如果跑到半馬拉松都係一個好好嘅鍛練，所以我哋最大可能係一齊跑半馬，希望明年成事啦！」

撰文︰Steven

編輯︰陳禮恒

美術︰Simon