歌手羅力威同雨僑今年8月榮升父母，夫婦二人都毫不吝嗇咁喺社交平台大曬囡囡Harper嘅得意樣，雨僑仲不時分享佢嘅湊B逸事同感受。早前雨僑透露BB滿月之後佢就要喺冇咗陪月嘅伯娘幫忙下獨力照顧囡囡，仲話好具挑戰性添！
（雨僑IG）
佢指自己一開始以為BB會生活好規律，但當佢着手自己照顧BB時，發現湊B真係一項「瘋狂任務」，大呻「真係人都癲」！
（雨僑IG）
不過原來湊B都唔係最大挑戰，尋日夫婦二人去幫Harper女攞出世紙就遇到一個大「難題」。雨僑透露幫Harper改嘅中文全名叫羅約彌，「約」即是新約聖經，彌賽亞的「彌」，係基督宗教術語，意指受上帝指派，來拯救世人的救世主：「話說今日去同BB攞出世紙，政府部門話無呢個字（約）、真係無、沒有、don’t have! 個職員超認真搞咗兩個鐘真係無喎！話無『翹（繞）絲邊』下面係三點，電腦入面無呢個字，要申請同埋等多三個月，真係開心大發現。」
（雨僑IG）
雨僑形容一班職員忙咗咁耐都係搞唔掂，搞笑又無奈咁加上Hashtag「膊頭有花全部入嚟」、「約喎」、「好common咋喎」，又話唔係「方中sir」呢個造出嚟嘅字。
Sir字都有得寫，約字竟然冇？（《新紮師妹》截圖）
而羅力威都喺自己嘅社交平台「出題」，叫大家講出「一人一個攞出世紙無嘅字」，又話Harper差啲改唔到呢個名，問佢係咪全香港第一個用「約」字名嘅BB。
（雨僑IG）
唔少網民都留言話自己有差唔多嘅經歷，指自己幫小朋友拎出世紙都有字型問題，例如「啟」同「啓」；「蘊」同「藴」等等。羅力威同雨僑執着於「約」字嘅部首係寫作「糹」，而非「糸」。網民指出「約」字從「糸」係傳統寫法，俗寫先作「糹」，所以其實出入境嘅電腦係冇問題嘅！
（網上圖片）
雨僑接受《晴報》電話訪問，佢手寫咗囡囡嘅中文名畀職員，職員看到個名之後好細心向佢講解：「職員好好，佢見到個約字係三點水『糹』，即刻同我哋講電腦會出小字『糸』，佢問我哋係咪一定要用三點水，咁我哋都諗一諗，最後都覺得要用番三點水。」
（雨僑IG）
雨僑解釋：「因為現時好多幼稚園都好堅持字體要用正字，擔心將來阿女返學，學校會堅持用正字，個寫法好重要，所以我哋最終都想用返三點水。依家職員畀咗個手寫版我哋，三個月後應該可以有張電腦版出世紙。」
（羅力威IG）
女兒快將兩個月大，雨僑稱囡囡近日有「百日哭」情況：「有一日佢連續喊咗12個鐘，我就抱足佢咁耐，一放低佢就喊同尖叫，喊到第二朝，初頭都唔知發生咩事，後尾帶佢睇醫生，醫生話佢有肚風，因為肚仔痛所以扭計喊，真係好攞命，但我都好享受一手一腳照顧佢。」
撰文：黃蘊姿