《阿爺廚房》添食第5輯 李家鼎譚玉瑛拍到濕身

TVB飲食節目《阿爺廚房》載譽歸來，李家鼎（鼎爺）夥拍譚玉瑛（阿譚）游走香港秘境，尋找消失的味道。節目已經拍到第五輯，今次拍攝困難在於面對疫情，但原來他們出外景時不單偶遇周潤發，又試過遇上大風雨，令兩人全身濕透。

《阿爺廚房》昨午舉行探班活動，鼎爺與拍檔譚玉瑛分享新一輯菜式概念，還即場炮製「百花釀甜豆」及「脆皮牛肋肉」兩道小菜，分享久違了的滋味。

鼎爺曾表示出外景幾乎被悶熱天氣焗暈，問他在今輯可有遇上相同情況？鼎爺表示︰「暈就無，不過因為遇上疫情，令到拍攝有啲阻滯，拍攝期間又經常大風大雨，搞到成身濕晒。」阿譚解釋︰「有一日去咗塔門，到目的地嘅時候就快打風，我哋坐船時遇上大風浪，不過風雨過後又出太陽，一日好似經歷四季，好彩我無暈船浪，但成個人濕晒。」鼎爺在旁笑言好像沖完涼一樣，幸好已穿上波褲打底。阿譚又稱︰「鼎爺脫掉一半面褲，露出打底褲幾性感！而我就好似乾蒸咁。」鼎爺即反擊︰「你唔着泳衣？」兩人鬥嘴令現場氣氛升溫。

強調鬥嘴並非不和

阿譚在節目中一邊試食一邊飲啤酒，鼎爺卻表示︰「我從來都唔會偷酒飲，因為成塊面會紅晒，點拍落去呀？如果我要飲，閒閒哋可以飲一支白蘭地，不過，成塊面紅晒拍唔到嘢啫。」阿譚又表示拍攝時間太趕，故不會出動私伙靚酒，因為飲酒要時間慢慢享受。兩人又強調在節目內雖然經常鬥嘴，但拍攝過程十分開心，鼎爺強調與阿譚沒有心病，一直以來只是外間的誤會。

採訪︰Pauline

編輯：陳禮恒

美術：梁政敏