連播4劇鋪路攞獎？ 高海寧唔敢爭視后

高海寧（高Ling）主演的劇集《C9特工》將於本周五大結局，昨日她與黎諾懿、簡淑兒等出席劇集宣傳。有指連環四套劇出街、「老是常出現」的高Ling，獲無綫鋪路贏視后，她坦言不敢多想奪獎的機會，只做好本份就夠。

今年高海寧曝光率奇高，主演的《殺手》、《迷網》、《反黑路人甲》及《C9特工》輪住播出，她笑說︰「其實幾套劇接住出係好開心，之後會休息下，我都幾乎無晒存貨，剩番一套《七公主》未出街，咁都定啲，驚觀眾出年見唔到我。」黎諾懿聞言說︰「你呢段時間可以返內地拍劇先，我都係得一套《刑偵日記》未播，希望遲啲多啲機會拍劇。」

高Ling表示日前特地在街頭訪問觀眾，對她在熒幕密密曝光有何意見。她說︰「觀眾普遍鍾意睇我嘅劇，其實連播四套劇，都唔輪到我控制，好彩《C9特工》連小朋友都鍾意。」有報道指無綫連環推出以上劇集，目的是為高Ling贏視后鋪路，她只說︰「我唔敢諗視后，呢啲講天時地利人和，我只係做好本份。」

黎諾懿恨攞視帝

黎諾懿則搞笑說︰「我希望可以喺最佳主持、最佳節目、連埋視帝三個獎一齊攞，到時我就可以息影喇。」今年諾懿主力擔任三個綜藝節目主持︰「除咗《疫境廚神》，仲有兩個節目，每個節目都要諗幾個餸，最近淨係諗煮咩餸，都諗到頭都大埋。」

另外，同場的簡淑兒早前承認與圈外男友復合，不過她強調以工作為重。無時間拍拖？她笑說︰「大家都好忙，我哋依家已經唔係熱戀期，一齊過又分開過，我哋對大家嘅性格、習慣同底綫已好了解。」會否考慮結婚？她說︰「今次再一齊，我哋反而無傾呢個話題，之前屋企人都畀壓力，依家我哋覺得跟感覺走好啲。」

採訪︰Pauline

編輯︰李潔盈

攝影︰林良明

美術︰梁政敏