【聲明】港生活網站並無進行電話推廣活動

樂與苦始終都有第一次 袁文傑︰戇居居做男一

發佈時間: 2020/10/14

每個人的人生中,有無數的「第一次」,有些可能微不足道,有些卻是畢生難忘的經歷,當中有喜亦有悲,袁文傑、江嘉敏、呂慧儀及林秀怡分別訴說難忘的「第一次」,不難感受到當中的苦與甜。

作為演員,能夠獲得演出機會,已經踏出成功的第一步,倘若登上「男一」更猶如中了頭獎。在亞洲電視出道的袁文傑,原本只是個寂寂無名的「路人甲」,突然有一日獲金牌監製賞識,點名做新劇男一,令他喜出望外,加上合作的卡士強勁,他認為是一個不能再複製的組合!

袁文傑獲監製賞識,原來跟他的身形高大有關,他說︰「97年我仲喺亞視,記得當日係大年初六,我返去廣播道試鏡,其實當時已經入組,仲係演二綫角色,但忽然有一日劇集《雪花神劍》監製蕭笙叔叫我去見佢,仲傾咗成個下晝,原來佢安排我做『男一』,當時我真係好驚訝,因為自己仲係新人,戇居居咁。佢覺得我夠高大,外形又似劉永同秋官(鄭少秋),所以蕭笙叔係我嘅伯樂,同劇仲有徐少強、米雪、John哥(姜大衞)、陳煒同楊恭如,呢個真係一個不能複製嘅組合。當時公司仲安排我去影月曆,我同江美儀都有份影,雖然個月曆已經唔見咗,但我好記得自己着咗成套黑色衫影相的。」

江嘉敏好威水︰考到電單車牌

江嘉敏難忘成功挑戰考電單車牌的經驗。去年她考第一關強制試,要在試場打「8」字圈,她說︰「我19歲時已考到貨Van牌,係工作關係去考嘅,之後真係用得着,於是諗到考埋電單車牌。我又唔驚危險喎,不過第一次揸車就跌損腳,都曾諗過放棄,直到考試當日,我提早三個鐘到試場練習,最終全班得兩個人及格,我係其中一個,當時即刻大叫,開心到跳起,哈哈!」半年前她pass埋路試,已正式攞到電單車牌了。

另一件難忘第一次,是江嘉敏跟媽媽嗌大交,「我大約13、14歲,有日媽媽幫我執房,丟咗我個水晶音樂盒,係小學老師送嘅畢業禮物,後來我喺垃圾桶發現咗,嬲到即刻鬧媽媽,點知佢話︰『係我丟嘅,咁又點?』又鬧我唔應該指摘長輩,結果冷戰咗一個禮拜,後來佢買咗相近款式嘅水晶球畀我,嗰一刻知道其實媽媽好錫我,只係平日唔會表達出來,真係感動到喊!」

呂慧儀勁感動︰蟹籽第一日返學

呂慧儀對六歲兒子「蟹籽」錫到燶,想起當年蟹籽踏入人生第一日校園生活,呂慧儀竟然感動到喊出來,她說︰「佢第一日返學,我感動過佢,仲同佢講︰『大個仔,返學啦!』」為了讓囝囝有良好的讀書環境,呂慧儀在蟹籽入學前已四出尋找好學校,又為他報讀多間幼兒園面試,她笑言︰「望住個仔着校服,原來有另一種感覺,當年個仔只得兩歲,仲係成嚿飯咁,到依家反而叫我等佢上咗校巴,行出路口同佢講拜拜。」

呂慧儀又自爆往事,當年學電單車時才發現剛懷孕一個多月,由於當時未見肚,所以膽粗粗繼續學車,如今已考取電單車牌的她笑言︰「我個電單車牌,蟹籽都有份㗎!」

林秀怡︰被監製訓話兩小時

林秀怡(Kirby)入行12年,去年在劇集《婚姻合伙人》成功彈出,演技更獲不少前輩讚賞。早前她與胡諾言一齊主持《我要做業主》,又跟朋友在「疫」市合資開美容院,連男友Kevin都有到賀。愛情事業兩得意,Kirby最難忘入行時TVB監製張乾文對她的一席話。她說︰「記得初入TVB,好多藝員都有機會被監製約見面,一般傾談20分鐘,但嗰次張乾文同我足足傾咗兩個鐘,佢『教訓』話我無野心,成日收收埋埋,應該要主動啲。嗰時我得17歲,傾完之後,佢無第一時間搵我拍劇,直到五年後先搵我,其後畀我好多機會,我要多謝佢嘅教導。」

另外,林秀怡憶起與男友Kevin第一次去旅行,「同佢拍拖兩年,第二年首次一齊去韓國旅行,好多朋友都認為情侶要一齊旅行才會了解對方,我哋去到韓國就好似老夫老妻,完全無嗌交,嗰一刻我已認定︰『係佢喇!』」

採訪︰Pauline

編輯:黃寶恩、陳禮恒

美術:Simon

樂與苦始終都有第一次 袁文傑︰戇居居做男一

江嘉敏曾為媽媽無意中丟掉具紀念性的音樂盒,兩母女先鬧交後冷戰。(IG圖片)

樂與苦始終都有第一次 袁文傑︰戇居居做男一

呂慧儀自爆當年懷着「蟹籽」去考電單車牌,真係膽識過人。(IG圖片)

樂與苦始終都有第一次 袁文傑︰戇居居做男一

林秀怡

樂與苦始終都有第一次 袁文傑︰戇居居做男一

林秀怡和男友的感情相當穩定,粉絲大讚他們有夫妻相。(IG圖片)