【百佳大抽獎】人車合一？自動導航？教你5招一分鐘掃盡最多貨

你登記咗百佳大抽獎未？如果你有幸成為10位頭獎幸運兒之一，可以喺12月初參加「一分鐘免費掃貨」活動，掃得幾多得幾多！呢種超市限時掃貨畫面，真係令人好懷念。話時話，有乜方法可以令自己掃到最多貨呢？不如參考以下5招：

招式1：人車合一

大購物車係要用雙手推先控制得好。要知道短短一分鐘內掃貨，如果雙手掛住「控軚」，真係好浪費時間，不如練習定用皮帶將自己條腰同架車綁埋一齊，實行人車合一，人跑，車跟住衝，唔使推，無論移動同「掃貨」都會更快。不過最好先搵部購物車練習吓，否則到時「炒車」就慘了。

{{hket:inline-image name="1014WLfeaturepage609.jpg"}}{{/hket:inline-image}}

▲學洛奇咁拖住架三輪車跑，都得啫！

招式2：八袋長老

由於暫時未知實際「落場」時，係咪只要參加者用「肉身」能夠帶番起點嘅貨品都算。如果可以，就要盡量擴大收納容量，架車雖然裝到唔少嘢，但如果事先著件好多袋嘅衫同褲，有需要時就可以盡量塞啦，釣魚背心同行山褲可以諗諗。

{{hket:inline-image name="1014WLfeaturepage610.jpg"}}{{/hket:inline-image}}

▲身上咁多袋，有需要時可以派上用場。（來源：網上圖片）

招式3：自動導航

今次舉辦「掃貨」活動嘅超市，相信好大機會係比較大型嘅旗艦店，咁一分鐘肯定跑唔晒間超市。咁事先當然要去「踩場」，熟習超市嘅環境、貨架位置同規劃定掃貨路線，最好將整間超市平面圖，畫晒出嚟兼標記埋貨品位置，再記晒入腦，到時就唔會漫無目的咁浪費時間（不過百佳到時更改高價貨品位置就另計）。

招式4：鎖定目標

超市貨品眾多，中獎者先要問自己一個問題：究竟是要自己需要嘅日常用品？定專攻高價貨品？一定要事先考慮清楚，不同人對高價值貨品各有所好，網民提議就包括小型家電、避孕套、高價罐頭、護膚品等。

{{hket:inline-image name="1014WLfeaturepage611.jpg"}}{{/hket:inline-image}}

▲專掃細件又貴嘅貨品，不失為可行嘅策略。（《換樂無窮》劇照）

招式5：模擬現場

掃唔掃到多貨，好睇你有無練習過，當然正常人好難貿貿然走入間超市跑來跑去掃貨，但搵個運動場或公園，模擬一下自己身處超市，練習1分鐘內究竟可跑到幾多個貨架去掃貨，同埋應該剩返幾多秒就要開始跑回起點等。有練過同無練過，表現一定爭好遠，信我！

「百佳大抽獎」活動
登記截止日期：10月18日晚上11時59分
登記網址：smile.parknshop.com

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/