陳奕迅（Eason）近日推出全新廣東歌《致明日的舞》，歌曲旋律輕快，在疫情下為大家紓鬱解悶。過往在MV中鮮有跳舞的Eason，今次親身上陣並隨音樂節奏擺動身體，不過他卻自爆遭友人嘲笑其舞姿，Eason無奈稱：「我跳得有型投入，係手臂粗咗啲。」疫情下工作機乎停頓，吸金力強的Eason亦手停口停，他自爆：「呢排荷包乾硬化，有些少急性發錢寒，哈哈！」
相關新聞：【港日麥當勞大不同？】陳奕迅木村拓哉拍廣告造型撞到正 搞笑扭腰蛇舞vs Chok爆咬包
Eason宣傳新歌《致明日的舞》。（大會提供）
佢話自己有荷包乾硬化。（大會提供）
Eason日前在網上接受傳媒訪問，全程「吹神」上身滔滔不絕，他直言在疫情每天都要觀察確診數字在生活實在令人擔憂，故希望透過新歌令大家去輕鬆面對生活。Eason表示：「疫情下我都多咗時間喺屋企，又做多咗運動，我鍾意打網球同滑雪，因為螺絲生咗銹我就做唔到呢啲運動，如果60歲都有40歲嘅身體你話幾好。」
訪問期間暢所欲言。（片段戴圖）
努力運動的Eason臉尖尖，消瘦不少。（片段截圖）
談到新歌MV，Eason找來一班素人跳舞，他笑言：「都見咗我個樣廿幾年啦，人哋唔厭我都厭。」不過Eason亦有親身上陣大騷舞技，可惜慘遭友人嘲笑，他表示：「我跳咗part用情緒帶動嘅現代舞，仲畀咗個朋友睇，佢成個ＭＶ睇得好投入，但一去到我出現，佢笑咗一下。（你舞姿問題？）唔知點解呀，我跳得咁有型，咁投入去跳，我覺得我係幾靈活㗎，不過略嫌手臂粗咗少少，大過你塊臉。」
展示其修身成果，大肚腩已消失。（片段截圖）
Eason話自己訪問期間開心到跳舞。（FB圖片）
Eason在圈中絕對是「吸金王」，但在疫情影響下，跟李克勤和陳柏宇等歌手都是零收入兼要食老本，Eason直言：「呢排係患咗個病，荷包乾硬化，有些少急性發錢寒，以前收入就比較平均。（收入跌咗幾多？）唔知呀，好耐無見過有『加號』囉，咁當然我有積穀防飢嘅，我諗都唔係淨係得我一個，好多藝人都係，可能全世界嘅人都有呢個病。」
澄清相中地方是公司，不是其寓所。（FB圖片）
與太太徐濠縈（東星圖片）
Eason大爆自疫情以來，今年只拍了一個快餐店廣告及錄音工作，但他挺享受這段悠閒時光，因為可以多陪伴家人，他說：「係幾享受，多咗時間喺屋企啦，同啲狗狗相處多咗，親密咗，同屋企人傾多咗偈。（老婆徐濠縈無嫌你煩？）佢唔使對住我㗎，佢都鍾意運動㗎嘛，我哋屋企好free，每個人都有個角落頭。」Eason又提到他早前在社交網上載一張在閣樓扮蜘蛛俠的相片，他說：「嗰度唔係我屋企嚟㗎，個樓底咁高，好明顯係公司，我只係上去檢查個燈掣，影咗張相留念。」
（FB圖片）
早前有報道指楊千嬅搶贏Eason奪得今年12月的紅館檔期，Eason亦主動澄清並無此事：「新聞話佢同我爭，都無爭過，我都唔知個演唱會押後到幾時，講真大家係咪開到都未知，入紙申請就申請咗先，我只係知道2021年應該冇乜期，有個消息話2020年取消場次嘅歌手可以優先畀期，但我嚴格嚟講係舊年年尾。」Eason又指自己每次Book個期好長，雖然大家未必介意他只開兩場，但他就十分介意，因他最少要開30場才可以抵銷昂貴製作費，所以前後要訂到35至40日檔期。問Eason是否心急再踏舞台？他說：「已經唔急，我諗可能喺街度見到個人都會同佢唱歌。」
撰文：倪小珊