【聲明】港生活網站並無進行電話推廣活動

疫情下荷包乾硬化 陳奕迅 發錢寒

發佈時間: 2020/10/21

陳奕迅(Eason)近日為全新廣東歌《致明日的舞》進行宣傳,疫情下Eason透過視像接受傳媒訪問,自爆今年只拍了一個廣告和錄音工作,所以銀行戶口很久沒有出現「加號」,並笑指自己患上荷包乾硬化及急性發錢寒,但挺享受這段期間跟太太徐濠縈、女兒陳康堤及愛犬更親密的相處,可謂「塞翁失馬,焉知非福」。

Eason今年七月為業界舉行網上籌款演唱會作公開露面外,其他日子幾乎都銷聲匿迹,直至近日宣傳新歌《致明日的舞》才再次現身。Eason談起新歌立即「吹神」上身,「希望大家聽到這首歌後,可以放鬆些面對生活,其實我都適應咗疫情生活,但始終成日都有擔憂,要睇住確診數字;音樂最好就係可以令到人開心。」

Eason透露疫情下,今年只拍了一個連鎖快餐店廣告和新歌錄音工作,收入大減,他笑指自己患了「病」︰「呢排患咗荷包乾硬化,仲有啲急性發錢寒,以前收入就比較平均。(收入跌咗幾多?)唔知呀,好耐無見過有『加號』囉,當然我有積穀防饑。我諗唔係淨係得我一個,好多藝人都係咁。」

同老婆囡囡各據一方

雖然疫情對情緒和生活都有好和壞的影響,但如今多了時間陪伴家人,Eason亦甚為享受,他稱︰「多咗時間在家中,同狗狗相處多咗,親密咗,同屋企人傾多咗偈。(老婆無嫌你煩?)佢唔使對住我㗎,佢都鍾意運動,我哋屋企好free,每個人都有個角落獨處。(你做多咗運動?)運動成日都有做,我鍾意打網球同滑雪,如果螺絲生鏽就做唔到,所以想keep住螺絲同關節靈活,如果60歲時有40歲的身體狀態,你話幾好。」

談到新歌MV找來一班素人跳舞,Eason笑言︰「都見咗我個樣20幾年啦,人哋唔厭我都厭。」不過他亦有親身上陣大跳「現代舞」,可惜慘遭友人嘲笑,Eason無奈表示︰「我跳咗part用情緒帶動的現代舞,仲畀個朋友睇,成個MV佢都睇得好投入,但一去到我出現,佢就笑咗一下。(你舞姿出問題?)唔知呀,我跳得咁有型,咁投入去跳,仲幾靈活㗎,係略嫌手臂粗咗少少,大過你塊臉。」不忘自嘲,十分鬼馬。

否認同千嬅爭紅館期

至於去年取消的跨年演唱會何時會復辦?Eason主動提起,有指楊千嬅爭贏他奪得今年尾紅館檔期,但他澄清「無爭過」。再追問何時再開演唱會?Eason指︰「講真未知係咪真係開到,我知道2021年應該無乜期,聽聞今年取消的可以優先揀明年的期,但我嚴格來講係上年年尾,而且我要book好長嘅期,雖然大家未必介意我只開兩場,但我介意,因為會補唔番製作費。(心急再開騷?)已經唔急啦,可能在街上見到人都會對住佢唱歌。」若大家野生捕獲Eason,就識做啦。

化粧︰Karry Wong

髮型︰Derek Li @ Xenter

場地︰香港瑰麗酒店Rosewood Hong Kong

撰文︰倪小珊

編輯︰黃寶恩

美術︰梁政敏

疫情下荷包乾硬化 陳奕迅 發錢寒

Eason在MV中大跳現代舞,但他嫌拍得手臂太粗。(片段截圖)

疫情下荷包乾硬化 陳奕迅 發錢寒

疫情下,Eason多了時間陪伴太太徐濠縈(左一)和女兒陳康堤(中)。(資料圖片)

疫情下荷包乾硬化 陳奕迅 發錢寒

Eason經常做運動,日子有功,明顯消瘦不少。

疫情下荷包乾硬化 陳奕迅 發錢寒

Eason今年七月在尖沙咀海旁為業界舉行籌款演唱會。(FB圖片)