【聲明】港生活網站並無進行電話推廣活動

給小動物一個家

發佈時間: 2020/10/22

已經好耐無呢啲感覺。見到佢,令我一見鍾情,一見憂心,我見猶憐……

佢叫做Willy,一隻一出世就非常命苦嘅小唐狗女。因為腳筋畸形,畀人丟喺垃圾站裏。

不幸中嘅大幸,閻羅王唔收佢,命不該絕。打風前夕畀好心人發現並聯絡保護遺棄動物協會(SAA)協助,結果因為佢係小BB兼不能正常行動,就算連大便都不能自理,需要特別照顧。於是SAA創辦人EL先將牠帶返屋企守護,再同專業醫生商討點可以讓佢得到適當嘅治療。

我就係喺打風後兩日,去EL家中作客時,第一次同Willy正式邂逅。見慣貓狗場面嘅我,點解特別會被Willy扣住心窩?因為佢實在太懂事。佢真係好乖,雖然行動不便,但當想尿尿嘅時候,佢會好辛苦咁從佢嘅床,努力爬出尿片度尿尿,絕不整污糟自己嘅床。如果需要大解時,便嗚嗚聲叫,請求別人抱牠幫忙排便。

我睇到佢嘅行為,完全無人教過,點解可以咁生性?尤其相對諗起我屋企嗰班任性大爺,就算我點教,佢哋都隨心所欲,隨地屙;鬧情緒嘅時候,仲專登跳上我張床,喺我仲瞓喺度嘅枕頭度射尿,之後仲要得戚咁望完我之後再跳落床!你可以想像我當時嘅情景嘛?所以當你見到面前可憐兮兮、會帶住感激眼神嘅Willy,你點會唔心都融化?

所以我好想帶佢返屋企,但我嗰班任性嘅貓、狗、鳥一定唔會畀Willy安寧。無奈。所以我只能祈求上天眷顧佢,畀佢可以遇到有心人可以去愛護佢。

其實喺保護遺棄動物協會(SAA)入面,仲有好多有缺陷或被遺棄嘅動物,等待遇上有心人去幫助佢哋,希望畀佢哋可以「失寵再得寵」。已經接收咗嘅動物,不論年老或殘缺,SAA都會安排佢哋喺度終老;當然最美好嘅結局,就係令呢班可憐嘅動物可以遇到有心人,畀佢哋一個真正屬於佢哋的家。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭