信和8大商場雙11壓軸優惠 $11搶購Dyson風筒Staub燉鍋

下個月就係「11.11」，黛安收到好消息，信和集團旗下8大商場，即屯門市廣場、奧海城、荃新天地、尖沙咀中心及帝國中心、中港城、黃金海岸商場及藍灣廣場，由下個星期三（28日）至11月11日，將會推出「日日Jetso日日Live」，聯同超過300間商戶，一連3個星期三下午1時半以11折發售$50電子現金券，可以即買即用，真係日日有Jetso呀！

黛安聽信和集團租務部市務及推廣總經理梁翠珊分享，佢話疫情下大家嘅消費模式轉變，利用綫上電子現金券銷售，可帶動綫下商場人流及消費，期望活動可帶動商戶第四季嘅生意，預計平均生意額將比9月增加2成。

講到「雙11」壓軸優惠，一定係「11.11」當晚9點正，奧海城fb網上直播，S+REWARDS會員可以$11搶購大熱貨品，當中包括價值$3,380嘅Dyson HD03 Supersonic風筒，同埋價值$3,599嘅Staub 24cm紅色圓形燉鍋等等，黛安聽到都心動。大家記得mark低時間同心水產品，到時一齊瘋搶啦！