舌遊日本 西營盤歎特色和牛

鍾情日本文化及美食的香港人，因疫情而閉關逾大半年，想必思鄉病發！刻下雖仍未能「返鄉下」報復性喪玩喪食，不過西營盤有一間居酒屋，東瀛氣氛超級濃厚。

西營盤雲集多元化美食，特色食店尤其多，最近有一間以武士為主題的勝本居酒屋，深深吸引街坊眼球。一入門口就見到全副日本武士盔甲、牆上鮮艷奪目的和風噴畫、天花掛滿日本油紙傘，整個氛圍都散發日本色彩。別以為這店是日本人所開，其實是外國人經營，請來洲際酒店著名日本餐廳NOBU及中環居酒屋Silencio的前行政總廚Sean Mell主理，繼續為食客帶來多款新派日本菜。

新派格調居酒屋

餐廳選用澳洲M6或M7和牛作為食材，和牛三文治先將北海道牛奶麵包微微烘烤帶脆，再將和牛加入鹽和辛辣粉，炸大約4至5分鐘，然後淋上蛋黃醬和炸豬扒醬汁，切開肉汁爆滿，豐富惹味。

Cheese burger平日就食得多，變成卷物又如何？大廚將和牛製成免治肉碎，加入洋蔥、胡椒及大蒜調味，中間塞滿煙熏車打芝士，再用紫菜包裹整件免治牛肉，沾上天婦羅炸粉再炸，感覺就像食芝士漢堡包一樣。至於招牌菜粟米天婦羅球，香脆可口，芝香味濃，佐酒一流。

編輯︰陳禮恒

美術︰梁政敏