謙仔改名羅子溢 否認為追男B

羅子溢（前名羅仲謙）、張曦雯（Kelly）及韋家雄等一班演員，昨日為熱播劇《木棘証人》宣傳。羅子溢與太太楊茜堯（前名楊怡）日前宣布齊齊改名，他透露已改名一段時間，但並非找高人改名，子溢解釋︰「無刻意，係緣分，希望改名後對家人好，亦想帶旺事業。（『子溢』有想生仔嘅意思？）呢啲只係好表面嘅解釋，生仔隨緣啦，純粹係計算筆劃同五行。」除了宣傳新劇，他閒時會在家中湊女，更自爆要扮人肉跳樓機、摩天輪及海盜船去冧囡囡。至於太太亦想復出拍劇，奈何暫時未能「甩身」，他又言不介意夫妻檔上陣，甚至一家三口亮相也可考慮，但笑言︰「咁會收好貴，哈哈！」

同場的Kelly透露在劇中出動私伙黑色喱士裙色誘子溢，她表示︰「每個女仔都鍾意買靚內衣，好似買靚鞋咁。（鍾意咩款式內衣？）我係model出身，最鍾意着肉色內衣做打底。」她又踢爆韋家雄拍劇時經常講周星馳經典對白及「食字gag」，有時會令她笑到失控要NG。