想做軒仔個唱嘉賓 關智斌自認面皮厚

關智斌（Kenny）、湯怡、衛詩雅及楊天宇等，昨早到將軍澳康城率先體驗英皇新戲院。提到張敬軒成為疫情下首位紅館開騷歌手，Kenny直認替軒仔高興，更表示會向好友自薦做表演嘉賓。

關智斌家住西貢清水灣，他表示日後到將軍澳睇戲會更加方便。問他會否考慮在將軍澳區置業？Kenny笑言︰「如果為咗睇戲去置業，實在太奢侈。（你擁有幾多幢物業？）咁我又無數喎，呢啲嘢都係交畀會計師去處理。」他反而對投資基金有更大興趣，亦正在構思搞網店生意。

提到密友張敬軒將於下月在紅館補辦六場《張敬軒X香港中樂團盛樂演唱會》，是紅館重開後的第一個演唱會，Kenny表示︰「真係可喜可賀，對好多人講真係好有意義，我以前個個月都有睇騷。（但入座人數減一半？）其實可以喺紅館開騷，意義大於一切，但我更希望可以除口罩，一齊揮動熒光棒、一齊唱歌，咁樣會更加有意義啦。（自薦做嘉賓？）我一定會自薦，但係人哋（軒仔）搵唔搵我又係另一回事，不過我面皮好厚，都會試下問嘅。」

此外，最近聘請了新工人姐姐的軒仔，卻在IG上載一批麵包、白粥早餐相，形容白粥杰撻撻、凍冰冰，麵包乾爭爭，苦笑無啖好食，又封工人做「早餐KOL」。Kenny聞言後笑稱︰「咁佢要開騷，食得清淡啲啫，都係為佢身體好，我發覺佢最近好似肥咗啲。」

湯怡不抗拒追求者

同場的湯怡透露，最近陪一班好友睇驚慄片，當中有初次見面的異性，她表示知道朋友的心意，本身亦不抗拒，她說︰「現階段都係成班朋友一齊食飯了解下先，順其自然啦，我從來都唔強求拍拖，暫時以事業為重。」提到該名男性追求者有份到訪湯怡香閨為她慶生，問她可有機會二人獨處？湯怡即強調從不會讓陌生男子留在家中。

至於衛詩雅稱喜歡獨自睇恐怖片，自言十分大膽：「我本身住村屋，屋企有好多蛇蟲鼠蟻，其實我唔驚，就算好大條蜈蚣，我會直接用鑊鏟打死佢。」

採訪︰Pauline

攝影：林良明

編輯：陳禮恒

美術：梁政敏