明天是西方鬼節--萬聖節，我們特意找來陸永、賴慰玲、張振朗和林淑敏分享曾遇到的怪事，其中陸永常夥拍C君一同工作，他表示兩人同房往往會出事，真係信不信由你！
農夫的陸永與C君常拍住一齊工作，陸永表示每次與C君出埠住酒店，若同住一間房就會「瀨嘢」，陸永回想︰「幾年前我同C君、嘟姐（鄭裕玲）去英國拍攝節目，我和C君同房，有一晚，C君好早瞓覺，我就喺度玩iPad，突然間C君起床去廁所，過咗一陣，佢返上床繼續瞓覺，我再玩咗一陣iPad亦都瞓覺了。但翌日C君同我講，佢去完廁所出嚟，見到有個長頭髮着紅色衫嘅女人企喺我隔籬，望住我玩iPad，我就問C君『究竟係我撞鬼定係你撞鬼？』」
導演也見過紅衣長髮女
之後陸永跟導演提及當晚經歷，「原來導演每日都會落街跑步，有一晚佢返酒店房時，喺搭電梯嘅倔頭路位置，竟然見到電梯裏面有個長頭髮着紅色衫嘅女人，當時大家即時諗到會唔會係同一個……。」
陸永話，只要不是與C君同房就不會有事，所以兩人之後出trip都會分房瞓，等大家都安心啲。
賴慰玲︰睇鬼片係貼錢嚇自己
外表強悍的賴慰玲，15年加入TVB不久就與鄭嘉穎、謝安琪合作劇集《殭》，並飛往荷蘭取景拍攝，其中一幕幕恐怖情節至今依然歷歷在目，賴慰玲表示︰「好記得喺荷蘭拍一場外景戲，我要行入一個洞，個洞喺山頭就好似一個墳墓咁，我哋要爬過一道矮閘，再一直爬去另一邊。個洞剛剛畀到一個成年人捐入去，我係第一個衝入去，起初好驚，覺得會有人頭飛出嚟，不過來回拍咗幾次，都無古怪事發生。」
賴慰玲又直言甚少睇鬼片，她笑言︰「睇鬼片好似畀錢嚇自己，好蠢！」她自爆小時候睇日本經典鬼片《午夜凶鈴》，一套戲要分開幾次睇，她說︰「每次睇到恐怖情節，我就即刻熄電視唔敢睇，好似女鬼喺個井爬出嚟，同埋最尾喺電視機爬出嚟嗰幕，我要隔幾日先再繼續睇落去。依家更加唔會睇鬼片，費事再嚇親自己，反而鍾意睇卡通片，哈哈！」
張振朗︰眼瞓能夠戰勝靈異事
張振朗遇過不止一、兩次「畀鬼壓」經歷，他讀中學時與家人住在屯門，「有一晚瞓覺時，突然聽到有把聲喺耳邊大嗌︰『喂！』真係好驚，明明全屋人都瞓晒覺。又試過瞓覺時成個人郁唔到，細個會認為係『畀鬼壓』，到長大後聽人講，有時人太攰，會令個身好重，突然間郁唔到，咁我為咗心安，惟有相信呢種科學說法。」
他入行做藝人後，曾聽過不少有關新、舊電視城的傳聞，更曾遇上奇異經歷。有一晚振朗拍劇至凌晨三、四點，就獨自在休息室躺下「回氣」，當時他開燈躺下，邊聽歌邊玩手機，突然燈光昏暗起來，「我第一時間撲出去睇下發生乜事，但周圍根本無人，於是繼續瞓，我發覺原來眼瞓係可以戰勝呢啲嘢，我就講︰『我真係好攰，你畀我瞓啦！』當晚再沒有怪事發生。」
林淑敏︰講大話換來一碗符水
林淑敏遇上的古怪事發生在八歲那年，她說︰「我細個嘅時候，爸爸媽媽經常唔咬弦，嗰陣知道媽咪準備移民，就同佢講咗一個大話。嗰時我嘅伯婆已經過身，有一日我同媽咪講伯婆報夢畀我，媽咪同一個朋友講起呢件事，朋友帶媽咪去問米，話請咗伯婆上嚟，佢話『我唔凍，不過我無嘢食，我想跟你返屋企』，之後媽咪畀咗一大筆錢做法事，那次我就要捧住三支大香，同媽咪一齊坐巴士，其實當時我好驚，但一直唔敢話畀人聽我講大話，到完成法事後，法師畀咗碗『甜品』我飲，就係一碗符水，真係自己攞嚟衰！」
事隔多年後，淑敏終於向媽咪說出心底的秘密，承認小時候說謊，但媽咪沒有責怪她，而淑敏也鬆了一口氣，毋須再耿耿於懷。
採訪︰Pauline
編輯︰黃寶恩
美術︰梁政敏