2020年大家都過得不容易，新冠肺炎疫情肆虐全球，影響住經濟、就業等，而大家經常都要保持社交距離，連朋友都少見，心情自然低落。適逢玄學家近來推出明年牛年運程書，不少人都好想即刻睇睇自己明年的運程會如何。其中，蘇民峰師傅除了出書外，更特別拍片講十二生肖的來年運程，大方免費分享，更揚言：「歡迎轉載！」認真大愛。以下是師傅片中十二生肖運程的概括情況，當然如果想詳情一點，可以去文尾有片睇！
(圖片：蘇民峰Facebook影片截圖)
【流行經典50年】Bob拖麥玲玲合唱《好好戀愛》 被洗版認獻醜：「Sorry囉」【下一頁】
屬牛：2009年、1997年、1985年、1973年、1961年、1949年、1937年、1925年等
屬牛犯太歲，財運排第4，桃花排第12。容易有悲觀、負面情緒影響，會胡思亂想，12、36、48歲的人士要留意情緒變化，24歲易感情變化，至於60歲要留意身體問題。今年屬牛人士易有撞車或者意外導致手腳損傷，農曆6月同12月就可以捐血或洗牙化解。份工幾唔如意都好，暫時唔好諗轉工住。一喜擋三災，有喜慶事沖起都唔錯。
在《愛回家之開心速遞》中飾演Ma姐的何綺雲正是屬牛。（圖片：《愛回家之開心速遞》電視截圖）
屬虎：2010年、1998年、1986年、1974年、1962年、1950年、1938年、1926年等
屬虎運氣普普通通，財運排第5，桃花排第1。紅鸞桃花係正桃花，未結婚會有婚嫁的機會，單身的人會有利於搵到個同你發展幾好感情嘅人。因朋友而破財，計劃會成空，解決眼前問題，見步行一步。心情不開朗，工作上傾向易被人截糊，如果你係自僱人士，漏夜傾好張單，都喺個客門口等到簽完先好走。
在《愛回家之開心速遞》中飾演朱凌凌的吳偉豪正是屬虎。(圖片：吳偉豪IG )
屬兔：1999年、1987年、1975年、1963年、1951年、1939年、1927年等
屬兔的運程一般，財運排第12，桃花排第8。沒有吉星，有一粒普通是非星，生於農曆3月6日至8月8日的人比寒命人好，直至2022年夏天才慢慢轉運，不用灰心。
在《愛回家之開心速遞》中飾演David的湯盈盈正是屬兔。（圖片：《愛回家之開心速遞》電視截圖）
屬龍：2000年、1988年、1976年、1964年、1952年、1940年、1928年、1916年等
屬龍的財運排第1，桃花排第9，在四大最好的生肖「牛龍羊狗」中，龍冇犯太歲，運程不錯。財運吉星有貴人星，如果上司、拍檔或下屬都可以成為貴人。
在《愛回家之開心速遞》中飾演大小姐龍力蓮的林淑敏正是屬龍。（圖片：《愛回家之開心速遞》電視截圖）
屬蛇：2001年、1989年、1977年、1965年、1953年、1941年、1929年、1917年等
屬蛇的財運排第10，桃花排第6。有遠方貴人扶助，即如果跟外國人生意或接觸會被睇高一線，做生意一般，如打工仔的話，地位會有所提升。人緣方面中上人緣運，吉星和凶星各有，可能易惹上官非、是非，易被小人篤背脊，唔使太擔心，所謂官非可能係可能亂過馬路、亂掉垃圾或冇戴口罩被罰錢之類。好悲觀，睇戲好易喊，抒發一下情緒都唔錯。
在《愛回家之開心速遞》中飾演George的張明偉正是屬蛇。（圖片：《愛回家之開心速遞》電視截圖）
屬馬：2002年、1990年、1978年、1966年、1954年、1942年、1930年、1918年等
屬馬輕微犯太歲，財運排第7，桃花排第3。小小是非唔需要專登留意，有霧水桃花，單身的人會易來易散，已婚會有唔好，三角關係會搞到一鑊泡，將霧水桃花化做人緣就好，如果工作要接觸群眾，如算命、化妝、保險、地產等接觸多群眾就特別有利。春夏天出世算不錯，如果是寒命人，今年不求有功，但求無過，唔好太積極。凶星會有小破財，平時想買又唔太捨得買嘅嘢，你就買咗佢就好。
在《愛回家之開心速遞》中飾演細龍生龍力士的鄭世豪正是屬馬。（圖片：《愛回家之開心速遞》電視截圖）
屬羊：2003年、1991年、1979年、1967年、1955年、1943年、1931年、1919年等
屬羊沖太歲，財運排第2，桃花排第11。沖太歲易有變化，住屋、感情同事業變化，感情方面，分手或者結婚都叫變化，本身打算結婚，或者準備有BB都係正常嘅。如果單身沖一段感情反而係好，唯一唔好係本身你有段感情而又未打算結婚，就會容易有危機，望平穩過度就好。今年唔係唔好，只係唔穩定。如果寒命人可以唔變就唔變，春夏出世嘅人會變好，但秋冬者變衰。沖太歲者搬屋、結婚或買屋，有大破財，唔一定白白破財，借今年使吓錢就化。農曆6月同12月留意易手腳損傷。其實屬牛、龍、羊、狗，今年腸胃差要留意。
在《愛回家之開心速遞》中飾演Jenny的陳偉琪正是屬羊。（圖片：《愛回家之開心速遞》電視截圖）
屬猴： 2016年、2004年、1992年、1980年、1968年、1956年、1944年、1932年等
屬猴財運排第6，桃花排第2。天喜桃花係正桃花代表有婚嫁的機會，單身就會發展不錯的感情。工作方面有幾個貴人星，感情易生煩惱，唔好搞搞陣，單身就唔好理咩桃花，有桃花點都好過冇桃花。易唔見銀包、手機、鎖匙等個人物品。
在《愛回家之開心速遞》中飾演Bonnie的林凱恩正是屬猴。（圖片：《愛回家之開心速遞》電視截圖）
屬雞：2005年、1993年、1981年、1969年、1957年、1945年、1933年、1921年等
屬雞太歲相合，財運排第9，桃花排第5。人緣好、是非少，人緣好自然工作順利，而且吉星多，容易地位、權力提升，打工仔有機會升職，而且今年搵到錢易又聚到財。不過手腳易受小傷，春夏出世的人收成進步特別快。
在《愛回家之開心速遞》中飾演熊心如的蘇韻姿正是屬雞。（圖片：《愛回家之開心速遞》電視截圖）
屬狗：2018年、2006年、1994年、1982年、1970年、1958年、1946年、1934年等
屬狗太歲相刑，財運排第3，桃花排第10。是非比較多，感情不太穩定，有是非唔能夠解決，腸胃比較出現問題，特別係農曆三月，六月、九月、十二月呢四個月特別要小心。容易面對面同人嗌交，如果有感情就會容易爭吵，如果單身相信你都會繼續單身落去，因為桃花機會不大。
在《愛回家之開心速遞》中飾演熊若水的呂慧儀正是屬狗。（圖片：《愛回家之開心速遞》電視截圖）
屬豬：2007年、1995年、1983年、1971年、1959年、1947年、1935年、1923年等
屬豬的財運排第11，桃花排第7，屬豬比較平，有遠方貴人扶助，如果工作上有外國人接觸或做外國人生意，今年都睇高一線。今年驛馬星走動會比較多，人緣或感情比較穩定，財運方面要加倍努力先搵到人哋一半，樣樣要靠親力親為，努力搵多啲。寒命人努力都冇用，等今年平穩過度，留力去到2022年先搏。
在《愛回家之開心速遞》中飾演金城安的周嘉洛正是屬豬。（圖片：《愛回家之開心速遞》電視截圖）
屬鼠：2008年、1996年、1984年、1972年、1960年、1948年、1936年、1924年等
屬鼠財運排第8，桃花排第4，易有負面情緒，決策錯誤，諗埋啲嘢都冇好結果，不過比2020年犯太歲已經好得多。如果上年結咗婚或者有埋BB，今年就正常，如果去年唔好彩分咗手呢，今年要努力少少，睇吓會唔會碰到以前識落嘅朋友，嚟到今年會走埋一齊呢？如果走得埋一齊，今年就會比較穩定。上年分手，今年就當然情緒不穩，如果結婚或生仔，今年都可能有少少情緒。工作上有機會升職，有小病要注意。
在《愛回家之開心速遞》中飾演大龍生龍敢威的羅樂林正是屬鼠。（圖片：《愛回家之開心速遞》電視截圖）
(影片：蘇民峰Facebook)
責任編輯：楊安莉