【聲明】港生活網站並無進行電話推廣活動

任《全民造星III》導師勁傷身 林二汶想做「花姐」二世

發佈時間: 2020/11/03

ViuTV偶像真人騷《全民造星III》昨晚首播,導師林二汶、彭秀慧昨日先率領參賽者顧定軒、前E-Kids成員林詠倫(Alan仔)等出席宣傳活動。二汶坦言在節目中講了不少刻薄說話激勵學員,幸好一路見到參賽者進步,二汶更有意做經理人繼續「造星」。

林二汶與彭秀慧昨日以導師身份,出席《全民造星III》記者會,她們笑言做導師傷身又勞氣,二汶說:「因為每次到淘汰環節,見到有參賽者出局,我都好肉赤同心痛,又試過同佢哋一齊捱好多晚通宵排練。雖然我哋有時講嘢好刻薄,但好開心睇到佢哋一路進步。」彭秀慧則說:「有啲參賽者初時行出嚟好似街坊咁,後來慢慢蛻變。」

二汶與彭秀慧坦言有時亦會睇錯人,以為某些參賽者「唔得」,但後來看見對方大有進步。問二汶可有想過轉行做經理人?她笑言想過向監製「花姐」黃慧君挖角:「有諗過簽藝人,但佢哋(參賽者)個個有人簽咗,睇下有無啲可以挖角,因為都想繼續睇住佢哋發展。」

40歲Alan仔年紀最大學員

前E-Kids成員林詠倫現年40歲,入行19年的他是年紀最大的參賽者。Alan仔起初擔心未能融入年輕學員圈子,幸好大家相處融洽。他說:「其實我同二汶同期出道,二汶係好好嘅導師,教我好多嘢,例如佢會提醒我嘅唱腔仲係好90年代,叫我唔好咁娘。」Alan仔坦言花姐起初對他有保留,幸好後來看到他的熱誠,他亦試過練舞練到抽筋,但得到其他學員關心,令他甚為感動。

至於學員陳康琪(Odi)及關嘉敏(卡文)同屬組合Bingo成員,她們笑言在首集便喊出位。卡文說:「我由第一日已經喊,集集都有喊,都怕自己喊得好樣衰。」

採訪︰Pauline

攝影︰林良明

編輯:李潔盈

美術:梁政敏

任《全民造星III》導師勁傷身 林二汶想做「花姐」二世

林詠倫(前)坦言在E-Kids年代無自信,參賽希望重拾信心。

任《全民造星III》導師勁傷身 林二汶想做「花姐」二世

陳康琪(左)及關嘉敏在節目中喊到面容扭曲。