武打巨星洪金寶年屆68歲，魄力依舊，雖然近年受到膝蓋問題困擾，行動不大如前，出入需要拐杖或坐輪椅代步，但「大哥大」仍永不言休。之前洪金寶因為糖尿病而改正飲食習慣後，臉頰消瘦不少。日前他接受鄭丹瑞網上節目《健康·旦》訪問，臉頰飽滿了，精神也不錯，聲線響亮，中氣十足地細數當年做武打演員的辛酸生涯 ; 他說正所謂拳頭無眼，受傷是家常便飯。
洪金寶話當年，不時手舞足蹈，表現好精靈。(《健康·旦》截圖)
洪金寶的膝患，是多年傷患的日積月累：「最早期拍武俠片，幾高跳落嚟，下面都冇嘢墊住，嘭！嘭！嘭！呢啲壓力同迫力都好犀利，又試過拍戲膝頭撞落石頭度，太多呢啲嘢嘞！」他指那個年代為生計不可能錫身：「餐搵餐食餐餐清，有乜嘢本事，有乜嘢能力都要show曬出嚟，要拚命先得。當年啲武師係搏嘅，我哋都一樣，好多年前拍一場巴士跌落馬路嘅鏡頭，個人跌落條石屎路度，但我哋都會照做。到後期先有禾稈草鋪帆布，叫做有嘢墊住，畀人撻落去！」
68歲洪金寶唔坐輪椅拐杖篤篤吓 靠洪天明攙扶72歲羅家英傍住 【下一頁】
雖然膝患仍在，但講到當年拍動作鏡頭，都忍不住來個「起雙飛」示範。(《健康·旦》截圖)
鄭丹瑞勸大哥大應該享受生活，但他說身體做到都會繼續做落去。(《健康·旦》截圖)
洪金寶提到當年到韓國拍電影《少林門》(1976年)：「當時成龍、元彪都跟住我，有個鏡頭由15呎高跳落嚟，做完反應就跨過欄杆，再一個前筋斗，撻落張枱度……太危險，最後焗住我自己上陣，我撻落嚟，張枱爛咗，再跣前十呎先停……我同工作人員講『唔好郁我』，一郁我就『標屎』！我再忍住，唔講嘢，等啖氣過咗，先至冇事，真係搵命搏……我就知道而家自己冇料，哈哈！」
阿旦問洪金寶知不知傷過身體多少部位？洪金寶風趣說：「傷就傷晒，兩隻手斷過三次，最後一次斷係拍《最佳福星》(1986年)。但好多嘢都係注定嘅，前一段戲，劉家良師傅喺度，同劉德華打完，就到我接上，拍我雙手按住兩邊物件，再起雙飛（雙腳踢起）撻落地！佢哋叫我嚟多次，我話唔得嘞，隻手斷咗，即刻去醫院打石膏，跟住再返現場繼續拍，因為我第二日就要飛加拿大，所以都要拍埋佢。」
洪金寶拍攝《少林門》，武打動作場面全部親自上陣。(網上圖片)
洪金寶為電影《葉問２》的一場「圓桌大對決」，打得精彩，令人印象深刻。(網上圖片)
訪問期間，洪金寶講到興起時，手舞足蹈，說到「起雙飛」直情雙腳撐起，好肉緊！他說做武打演員沒法錫身：「付出體力，付出身體，命都要付出！」問到膝蓋手術是否逼不得已才做？「手術有做過，但換膝頭 (人工膝關節) 就未試過，我知好多人做完都ok ; 但其他人唔同動作演員，我哋拍動作片，又踎又踢咁，擔心做完呢種手術，做唔到呢啲動作，會牽制住我，所以我而家會紮實個膝頭，等佢痲痺晒先去做動作。」此時，快將66歲阿旦都忍不住勸他休息一下享清福，大哥大竟笑謂：「我而家唔透啦，諗住遲啲先長透！好多人叫我退休，但我仲講得嘢、鬧到人，第二，仲諗到嘢，上天畀你嘅才能嘛 ; 當你做得、仲諗得，就應該繼續做，到啲嘢真係退化晒時，費事出醜咪退休囉，係做唔到先退，唔係唔退！」
洪金寶因長期膝患，出入要羅家英和兒子洪天明攙扶出入。(圖片︰微博)
洪金寶稱，雙手曾因多次拍戲而斷。(《健康·旦》截圖)
高麗虹為丈夫健康著想，終於成功勸戒他改變飲食習慣減磅。(圖片︰東星)
撰文︰衛紫敏
【全城集氣】余慕蓮疑患血癌插喉發短訊道別 樂善好施擬將遺產全捐出做慈善 【下一頁】