現年43歲的陳展鵬2018年同細佢13年嘅單文柔拉埋天窗,翌年4月就生咗寶貝女「小豬比」陳諾瑤(Quinta)。自小豬比出世後,展鵬落力搵奶粉錢,單文柔就全職湊B,喺IG大方分享囡囡嘅日常,而不時出鏡嘅展鵬每次都情不自禁流露出一個慈父樣,畀老婆公開咗佢係個「女兒傻瓜」!
(陳展鵬IG)
噚日,單文柔就Po咗「Daddy’s girl」小豬比聽歌仔學英文嘅短片,片中小豬比跟住節奏拍手,歌詞唱到有「heads, shouders, knees and toes」和「eyes and ears and mouth and nose」時,活潑嘅小豬比會跟從英文觸摸身體相關部位,精靈到唔似1歲半人仔!
(單文柔IG)
(單文柔IG)
另一重點係,喺小豬比對面嘅爸爸陳展鵬,加入哼歌,之後側頭哄近小豬比叫佢「Kiss Kiss」,小豬比完全唔理滿面鬍鬚嘅爸爸有幾「拮拮」,好聽話錫咗爸爸一啖,展鵬又點會唔吖!
(單文柔IG)
之後小豬比仲擰向鏡頭,疑似向鏡頭後面嘅媽媽露出勝利笑容,真係頂呢個「前世情敵」唔順呀!
(單文柔IG)
片尾,陳展鵬問小豬比:「toes喺唔喺度呀?」,小豬比指一指自己腳仔,之後再問佢「finger呢?」,小豬比即刻望住自己手指,並重複「finger」,展鵬寵女之情溢於言表,大叫:「Finger, yeah!」,真係同平日喺熒光幕前Chok爆嘅佢完全唔同。
(單文柔IG)
(單文柔IG)
其實小豬比令媽咪「失寵」都唔係第一次!之前單文柔生日同老公、囡囡影大合照嘅時候,展鵬同小豬比竟然無視佢而深情對望,搞到單文柔呷醋:「你哋要打情罵俏都唔好揀今日,知唔知今日的主角係邊個!」,佢當然只係講吓笑,有邊個唔希望自己老公錫囡囡吖!
(單文柔IG)
(單文柔IG)
撰文:黃蘊姿