【聲明】港生活網站並無進行電話推廣活動

煮甜品燒着眼睫毛 黎諾懿變惹火廚神

發佈時間: 2020/11/11

黎諾懿、陳敏之昨日出席《big big shop超級感謝祭》宣傳活動,兩人最近頻頻一齊主持節目,敏之取笑諾懿豬籠入水,而他則自爆早前又發生入廚搶火事件:「我煮焦糖蘋果時,眼睫毛燒燶咗少少。」

黎諾懿最近不斷在節目中做「教煮」,除與陳敏之一齊主持《今晚請客》,又跟幾位廚藝大師主持《疫境廚神秋冬盛宴》。問諾懿擔任主持後是否獲帶挈搵外快?他笑言︰「有少少啦,都有廣告商搵我,因為本身鍾意煮嘢食,又鍾意試下啲新廚具,最好有贊助商送畀我用。」

諾懿早前拍攝煮食節目時,險些燒着錄影廠,最近他又遇上小意外,燒燶了眼睫毛,身旁的敏之聞言亦大吃一驚。諾懿透露︰「嗰日煮焦糖蘋果,開頭以為無乜嘢,個畫面又好靚,點知突然間個火燒咗上去,我啲眼睫毛燒燶咗少少,返到屋企要老婆幫我修毛,睇番條片都幾恐怖。」敏之笑言︰「我真係要小心啲,以後同你一齊做煮食節目,我會企後啲避一避。」

陳詩欣望搶到花球

同場的陳詩欣提到好姊妹余香凝(Jennifer)於本周六出嫁,身為姊妹團之一的她笑言︰「Jennifer唔會想我哋玩佢老公。(到時會否主動搶花球?)當然,佢話會留畀我,因為好多人爭,好似廖子妤都想搶。(想快啲嫁?)又唔係,但同男友感情都穩定。」

採訪︰Pauline

編輯:陳禮恒

美術:Simon

煮甜品燒着眼睫毛 黎諾懿變惹火廚神

陳詩欣笑言跟陸浩明女友撞名,經常惹來誤會。