【闖禍達人】林師傑舉中指得罪7個監製被雪 演「木偶哥」翻身再開口夾著脷

林師傑效力無綫十一年，今年6月喺社交平台表示同無綫以及星夢解約，大爆無綫向佢提出轉簽「6 show」合約，即意思一年保證有萬二蚊收入，師傑暗寸舊公司「恩賜」，拒絕新合約，決定外闖。

{{hket:inline-image name="06a35128564607717c1e44d79985d43bsaasftp20200221.jpg"}}{{/hket:inline-image}}

（東星娛樂）

林師傑日前接受阮德鏘YouTube節目《囍趣台》訪問，透露自己喺無綫多年都得唔到高層歡心，仲聽到唔少負面嘢：「啱啱入行嗰陣做好多嘢得罪人，明知唔應該做，又走去做，真係好大鑊。」指自己由細到大做人都唔夠圓滑，唔識得人情世故。

{{hket:inline-image name="9.JPG"}}{{/hket:inline-image}}

（節目截圖）

無綫嘅日子，林師傑曾經喺幕前消失咗一段時間，主持人之一阮德鏘大爆，原來係因為佢向一架七人車嘅司機「舉中指」，師傑就話真相其實係咁，「嗰日我揸車入錄影廠，喺環保大道駛到去到燈位，嗰陣係綠燈，但前面架車突然踩brake，我就輕輕『呠』佢，之後嗰個司機落車，我已經心知不妙！但嗰陣我個人好『著』嘛，諗住鬧人，我覺得對方認得我，可能係公司高層啦！」當時佢攤開雙手，「我做咗一個『做乜嘢事』嘅表情，個司機再望吓我，就算轉咗綠燈都唔開車！」師傑之後cut去慢線開車走，結果好快就知「闖禍」。

{{hket:inline-image name="6.JPG"}}{{/hket:inline-image}}

（節目截圖）

「攤開雙手」變「舉中指」。林師傑話自己好快就收到兩個監製、PA、經理人嘅電話：「話我舉中指，一次過X咗7個監製（相信七人車上載住7個監製）。」後來樂易玲（無綫助理總經理（藝員管理及發展））向佢問清楚事件來龍去脈，「探討」師傑嘅駕駛態度，最後總結係話佢超速，即係佢錯晒。最後師傑要親身到7位高層房逐一道歉，更被「雪藏」差唔多一年。

{{hket:inline-image name="7589a6c162052102308d934c78fd627bsaasftp20200221.jpg"}}{{/hket:inline-image}}

曾勵珍（中）與樂易玲（右）。

幸好最後獲珍姐（曾勵珍，無綫助理總經理（戲劇製作））安排林師傑演出《愛‧回家》中「木偶哥」一角，帶挈佢憑劇中插曲《小木偶的話》在《勁歌金曲》奪獎。但轉個頭又再開口夾著脷得罪人，佢憶述：「嗰陣我第一個多謝嘅人係珍姐，諗住《小木偶的歌》係套劇嘅歌，所以咪多謝珍姐先，點知原來係音樂頒獎禮，要先多謝歌曲監製，我次序錯咗，所以又得罪人，結果又畀人鬧。」

{{hket:inline-image name="7dc908e4b565b23501f5b6b850fe8506.jpg"}}{{/hket:inline-image}}

林師傑太太歐陽巧瑩對佢外闖發展事業非常支持。（東星娛樂）

撰文：黃蘊姿