【聲明】港生活網站並無進行電話推廣活動

角落小夥伴屯門市廣場教整甜品 小丸子YOHO MALL介紹農作物

發佈時間: 2020/11/13

今個聖誕節雖然無得去旅行,但唔少商場都出盡法寶為大家準備不一樣嘅聖誕節,有好多活動、打卡點陪住大家過節㗎!黛安收到風,近期萌爆嘅角落小夥伴將會去到屯門市廣場,開烘焙工房「Sweet Christmas Studio」,本月28日起至明年1月3日,喺1樓中央廣場教大家整7款角落小夥伴造型嘅甜品,例如薑餅曲奇等。商場更設3大主題打卡區,包括「可愛草莓咖啡店」、「甜蜜雪糕花園」及「幸福聖誕角落」,更有以草莓造型亮相嘅白熊迎接各位甜品控!場內嘅期間限定店仲有唔少首次面世嘅角落小夥伴精品,黛安都打算去搶購啊!

如果想過一個文青啲嘅聖誕,即日起至明年1月3日不妨去YOHO MALL,可以睇盡2,500呎「聖誕森の花園」,花園有6米高炫白夢幻聖誕樹,由聖誕花圈組成嘅星空花圃,仲有由蕾絲打造嘅「花影長廊」等,好似置身山林野谷嘅秘境。

公關姊妹亦推薦去YOHO MALL搞嘅都市農莊體驗導賞團,由兩位80後創辦人講解都市耕種,場內仲有小丸子為大家介紹3年4班同學仔努力收集嘅農作物,但佢哋就隱藏喺啲QR Code入面,要同小朋友鬥快喺場內搵啦!

撰文: 黛安 消息特靈八卦公關
欄名: 八卦名利場