很多人都試過聲音沙啞或者失聲，通常跟壓力大，或進食太多煎炸食品等有關。嗓子對普通人都相當重要，更何況是藝人，突然失聲簡直係十級痛苦，隨時影響工作。不少藝人都有開聲心得和養聲秘方，今次找來楊千嬅、森美、許廷鏗和羅子溢分享，大家不妨好好牢記，以備不時之需！
楊千嬅歷年來開騷無數，今年底將會再踏紅館舉行跨年演唱會，身為歌手的她，最傷痛莫過於開騷期間失聲。
她憶述04年舉行五場《楊千嬅演唱會開年大典VOL 3》，因患上感冒引致氣管發炎，結果把聲即出事，不得不每晚開騷前搵醫生打類固醇針幫助開聲，千嬅說︰「好慘㗎！失聲有好多原因，可能因為壓力大，或者飲食營養唔均衡，抵抗力差，身邊有人傷風、感冒就好容易受感染。」
沒有歌手想經歷失聲之苦，所以千嬅平日會嚴守養聲方法。「養聲不單止係開騷前，平時都要保持練聲，還有一定唔可以飲凍嘢，盡量保持室溫，就算我幾想飲凍嘢，都只係放入雪櫃十分鐘，有冰涼感覺就夠了，呢種方法又唔會傷身。此外，運動同休息時間都好緊要，疫情期間本來我瞓得好好，不過最近個仔（Torres）開始復課，每朝七點要起床幫佢探熱，下午佢放學返屋企就要開始做功課，其實我要到夜晚先可以開會、做運動等，近排我將所有運動器材搬返屋企，單車機、啞鈴……仲要準備一個禮拜的食物。」
森美︰飲鹹竹蜂好似吞異形
森美從事廣播界多年，更踩入電視台拍劇及主持節目，對於用聲，他絕對有心得，當然對「失聲」亦甚有經驗。
他最難忘約十年前演出多場舞台劇《森美小儀歌劇團》時，臨近尾場卻突然「失聲」，初時未算嚴重，森美媽媽給他飲鹹竹蜂，他笑言︰「嘩，感覺好怪，好似飲異形一樣！只係覺得潤喉，紓緩咗一陣，但又未至於仙丹咁即刻開聲，最後都要搵醫生打類固醇針先得。」
對於養聲方法，森美自有一套心得，他指出，電台開咪和平日講話的用聲是不一樣，「最緊要講嘢唔好快同急，聲沙係因為唔夠氣，所以講嘢一定要慢同適當時候要唞氣。」至於用聲，森美笑指與小儀在電台合作多年，她經常將聲綫拉高來說話，森美就懂得避重就輕，他說︰「男人聲經過支咪會比較沉，因為唔想畀小儀把聲蓋過，我就夾硬拉高咗把聲，但聽眾其實會覺得好吵耳，到用番真聲，聽起來就覺得把聲好攰。試過有客戶搵我做司儀，要求我用『真聲』，其實佢哋聽慣電台嗰把聲係我特登拉高聲綫的。唉！做唔番自己，要就小儀嘛！哈哈！」
許廷鏗︰蒸氣清理鼻腔污穢物
出道以來，許廷鏗都被讚擁有一把靚聲，但他曾經因為用聲過度，每次唱歌都好似亂嗌一通，令歌迷以為他好大壓力。
他表示︰「可能嗰時我唔識得錫住把聲，每次唱歌都好似好用力去唱，啲人就覺得我會唔會係好大壓力？我之後明白到要養好把聲，最好方法係改變唱歌方法。後來我開始利用蒸氣，每次唱歌前，好似今朝我會用蒸氣蒸下個鼻，方法是先倒一盆熱水，用個鼻去吸熱水，主要希望清番鼻腔內的污穢物，因為有時抹鼻涕，鼻腔啲污糟嘢未必會隨住鼻涕流出嚟，所以用蒸氣方法清除入邊啲污染物。試過有朋友去洗鼻，我覺得呢個方法其實唔係咁好，反而用蒸氣方法會令到聲綫更加耐用，尤其依家秋天天氣乾燥，呢個方法更加可行。」
羅子溢︰脷底含住蜈蚣丸護聲
羅子溢（前名羅仲謙）平日小心養聲，他直言演出期間「失聲」的經驗近乎零，但談到養聲方法，他願意大方分享，但未知大家是否夠膽嘗試？他說︰「我一向好少飲凍嘢，就算天氣幾熱，都只會飲暖水，始終凍飲對聲帶唔好。以前做舞台劇，為咗養聲，我會每日服食一粒蜈蚣丸，係放喺脷底含住，直到成粒溶晒，雖然聽個名好似好恐怖，但功效好好。依家我唔使做舞台劇，就無再食喇。」
採訪︰Pauline
編輯：黃寶恩
美術：梁政敏