【聲明】港生活網站並無進行電話推廣活動

急救失聲之苦 楊千嬅公開養聲秘技

發佈時間: 2020/11/13

很多人都試過聲音沙啞或者失聲,通常跟壓力大,或進食太多煎炸食品等有關。嗓子對普通人都相當重要,更何況是藝人,突然失聲簡直係十級痛苦,隨時影響工作。不少藝人都有開聲心得和養聲秘方,今次找來楊千嬅、森美、許廷鏗和羅子溢分享,大家不妨好好牢記,以備不時之需!

楊千嬅歷年來開騷無數,今年底將會再踏紅館舉行跨年演唱會,身為歌手的她,最傷痛莫過於開騷期間失聲。

她憶述04年舉行五場《楊千嬅演唱會開年大典VOL 3》,因患上感冒引致氣管發炎,結果把聲即出事,不得不每晚開騷前搵醫生打類固醇針幫助開聲,千嬅說︰「好慘㗎!失聲有好多原因,可能因為壓力大,或者飲食營養唔均衡,抵抗力差,身邊有人傷風、感冒就好容易受感染。」

沒有歌手想經歷失聲之苦,所以千嬅平日會嚴守養聲方法。「養聲不單止係開騷前,平時都要保持練聲,還有一定唔可以飲凍嘢,盡量保持室溫,就算我幾想飲凍嘢,都只係放入雪櫃十分鐘,有冰涼感覺就夠了,呢種方法又唔會傷身。此外,運動同休息時間都好緊要,疫情期間本來我瞓得好好,不過最近個仔(Torres)開始復課,每朝七點要起床幫佢探熱,下午佢放學返屋企就要開始做功課,其實我要到夜晚先可以開會、做運動等,近排我將所有運動器材搬返屋企,單車機、啞鈴……仲要準備一個禮拜的食物。」

森美︰飲鹹竹蜂好似吞異形

森美從事廣播界多年,更踩入電視台拍劇及主持節目,對於用聲,他絕對有心得,當然對「失聲」亦甚有經驗。

他最難忘約十年前演出多場舞台劇《森美小儀歌劇團》時,臨近尾場卻突然「失聲」,初時未算嚴重,森美媽媽給他飲鹹竹蜂,他笑言︰「嘩,感覺好怪,好似飲異形一樣!只係覺得潤喉,紓緩咗一陣,但又未至於仙丹咁即刻開聲,最後都要搵醫生打類固醇針先得。」

對於養聲方法,森美自有一套心得,他指出,電台開咪和平日講話的用聲是不一樣,「最緊要講嘢唔好快同急,聲沙係因為唔夠氣,所以講嘢一定要慢同適當時候要唞氣。」至於用聲,森美笑指與小儀在電台合作多年,她經常將聲綫拉高來說話,森美就懂得避重就輕,他說︰「男人聲經過支咪會比較沉,因為唔想畀小儀把聲蓋過,我就夾硬拉高咗把聲,但聽眾其實會覺得好吵耳,到用番真聲,聽起來就覺得把聲好攰。試過有客戶搵我做司儀,要求我用『真聲』,其實佢哋聽慣電台嗰把聲係我特登拉高聲綫的。唉!做唔番自己,要就小儀嘛!哈哈!」

許廷鏗︰蒸氣清理鼻腔污穢物

出道以來,許廷鏗都被讚擁有一把靚聲,但他曾經因為用聲過度,每次唱歌都好似亂嗌一通,令歌迷以為他好大壓力。

他表示︰「可能嗰時我唔識得錫住把聲,每次唱歌都好似好用力去唱,啲人就覺得我會唔會係好大壓力?我之後明白到要養好把聲,最好方法係改變唱歌方法。後來我開始利用蒸氣,每次唱歌前,好似今朝我會用蒸氣蒸下個鼻,方法是先倒一盆熱水,用個鼻去吸熱水,主要希望清番鼻腔內的污穢物,因為有時抹鼻涕,鼻腔啲污糟嘢未必會隨住鼻涕流出嚟,所以用蒸氣方法清除入邊啲污染物。試過有朋友去洗鼻,我覺得呢個方法其實唔係咁好,反而用蒸氣方法會令到聲綫更加耐用,尤其依家秋天天氣乾燥,呢個方法更加可行。」

羅子溢︰脷底含住蜈蚣丸護聲

羅子溢(前名羅仲謙)平日小心養聲,他直言演出期間「失聲」的經驗近乎零,但談到養聲方法,他願意大方分享,但未知大家是否夠膽嘗試?他說︰「我一向好少飲凍嘢,就算天氣幾熱,都只會飲暖水,始終凍飲對聲帶唔好。以前做舞台劇,為咗養聲,我會每日服食一粒蜈蚣丸,係放喺脷底含住,直到成粒溶晒,雖然聽個名好似好恐怖,但功效好好。依家我唔使做舞台劇,就無再食喇。」

採訪︰Pauline

編輯:黃寶恩

美術:梁政敏

急救失聲之苦 楊千嬅公開養聲秘技

楊千嬅

急救失聲之苦 楊千嬅公開養聲秘技

DJ出身的森美對養聲甚有心得。(IG圖片)

急救失聲之苦 楊千嬅公開養聲秘技

許廷鏗利用蒸氣開聲,大家又試過未?(IG圖片)

急救失聲之苦 楊千嬅公開養聲秘技

羅子溢注重養生,平日戒凍飲,常飲暖水,以免刺激聲帶。