一味靠估買股票

近排我啲朋友見到我，就叫我「女股神」。呢個稱呼，擺明係揶揄我臨老學玩股，希望never too late啦！

我前半生同股票嘅緣份，源於喺19歲左右，當時有一隻叫「十字軍」嘅股票，升到吧吧聲，當我一去買，即刻跌到冚冚聲。結果十字軍殺到我一頸血，全軍覆沒！差啲要call埋十字車！從嗰次之後，我聞股色變，再無買過股票了。

另一個原因，除咗認定我係一個無賭運嘅人之外，唔識計數亦係我一個投資嘅絆腳石。總之一見到一堆數字，我就唞唔到氣。咁點學人投資呀？

點解而家我又會踩入呢個股票市場呢？原因銀行而家嘅存款利息實在少到喊。如果我唔去增值下，睇怕真係擔心自己太長命，坐食山崩。除咗不停買六合彩外，我都有去做外幣掛鈎。相比股票，外幣定期雖然比港幣好啲啲，但都係本大利小，兼且混亂政局影響大圍經濟。睇住你揸嘅外幣，一路去唔到你嘅價位，但你又唔能夠斬纜，令人有坐以待斃嘅感覺，我唔鍾意。於是我就開始上YouTube睇片學買股票了。

當然以我呢個數字白癡，絕對係唔會睇得明白，所以要實戰才能實踐，先至能夠學識搵錢。

身邊嘅朋友，見到我平時為人衝動，大家都好驚我會亂性。經常提我嘅說話係︰「贏粒糖，輸間廠。」我亦見唔少本來有錢嘅朋友，太進取玩股票結果由有錢人變咗窮人。呢啲前車可鑑，絕對係我嘅借鏡，唔會太進取去做大風險嘅投資。我警惕自己不能因買咗股票會令自己發生食唔安瞓唔落嘅情況。

學玩股票後，我睇多咗財經同時事嘅新聞。我就係因為聽到當日新聞話滙豐獅子重出江湖，為表支持，買咗滙豐，結果賺到錢，令我好開心。天氣開始凍，我買咗火鍋食肆股，畀我賺到少少，又令我好開心。

我用E（environment）、S（society）、G（government）呢個理念嚟揀我嘅心水，當有得贏，自我感覺特別好，特別開心……

我呢個大媽講股，絕對靠估！絕對要令自己投資得開心！

（本欄逢周四刊登）