25歲的鄧卓殷（Amber）在新劇《踩過界II》一出場就跳樓自殺，角色陳詩涵背住單親媽媽做援交少女，可惜被欺騙感情，更遭男友柯宇霖（丁子朗飾）公開侮辱兼網絡欺凌。港姐出身的她雖然戲份及對白不算多，而角色要超淡妝加上豐富的內心戲，對於身為拍劇初哥的她已是極大考驗。
劇中被男友丁子朗欺騙感情，甚至公開侮辱。(《踩過界II》電視截圖)
遭受網絡欺凌因而選擇跳樓輕生。(《踩過界II》電視截圖)
網絡世界，說甚麼也不用負責。(《踩過界II》電視截圖)
Amber今次是第二次拍劇，陳詩涵這個人物的設定與現實的自己反差較大，「呢個角色一出場，多數係喊、鬧交為主。我份人比較樂觀，但拍劇要勁喊，怕自己情感發揮未到位。」她指自己是個眼淺的人，「不過就好少係人哋面前眼淺，我係幾容易因為小事而感動想喊，喺人前會一定會表現得好堅強！記憶中，咁多年嚟喺學校喊過一次，今次角色要好強烈咁表達情緒，展現到自己嘅另一面。」
有不少爆喊場口，考起演技。(《踩過界II》電視截圖)
她直認拍攝前十分緊張，為角色做了不少準備工夫，「會做定資料搜集 ，搵吓援交少女嘅內心世界係點，同埋點解佢哋會去做。」
Amber為角色做了不少準備。(《踩過界II》電視截圖)
提到難忘場面，她指是跳樓、墮到蔡思貝車頂的那一幕，「同場嘅張振朗、蔡思貝好細心教我點樣可以演繹得較逼真，動作姿勢要點樣，表情要點做，同埋吐血都有技巧，張振朗更加親身示範！」
鏡頭一轉，Amber伏屍車頂……其實是重傷昏迷。(《踩過界II》電視截圖)
早前於IG上載幕後花絮相片，仲笑話啲假血好甜。(鄧卓殷IG)
Amber在香港中學文憑試中考獲4科「5**」，之後於香港大學修讀建築系學士，是一名高材生。她沒有選擇做建築師，放棄有前途、有穩定收入的專業，冒險參加2018年的《香港小姐競選》，最終獲得亞軍及「最上鏡小姐」。
入行後，Amber忙於幕前的工作、學業，現正修讀建築系碩士課程，預料明年5、6月畢業，「建築碩士係選港姐之前已經報讀，呢個目標之前已經定下，我好想完成佢。無論係學生、藝人，我都擺盡100%精力去做，讀書期間繼續拍劇、做節目，又去演藝上堂，用盡時間增值自己。」
香港大學建築系畢業。(鄧卓殷IG)
指定動作。(鄧卓殷IG)
2018年獲港姐亞軍及「最上鏡小姐」。(東星娛樂)
跟「師姐」朱千雪一樣好學不倦，隨時為轉行打算？她認為︰「其實讀建築唔一定要做建築師，我覺得係思想嘅訓練嚟。建築系多數係每人設計一個project，好多問題要自己解決。課程係集中點樣去解決問題，做人唔係好死板。」她又表示建築師和演員，職業性質相似，「設計一棟樓，諗點樣實踐，好似演員為一個角色設計背後故事，因為有時編劇未必寫得好仔細，演員自己要畀心機去設定。讀建築無話框死咗一定要做相關行業，反而係擴闊咗自己思路。」
Amber認為讀建築對演藝路有幫助。(《晴報》楊嘉傑攝)
Amber慢慢愛上演員這份工作，「未入行前覺得演員嘅定位好特別，可以試唔同職業、經歷唔同角色嘅唔同人生。」
除了《踩過界II》，未來尚有《大步走》、《兒科醫生》、《拳王》等見街。(《晴報》楊嘉傑攝)
Amber同哥哥年紀只差一年，十足餅印一樣，仲會一齊拍片做Youtuber。(鄧卓殷IG)
對於未來，她指現正跟武打女星楊盼盼習武，學打拳，為打女角色鋪路，「盼盼姐叫我拋底女仔形象，打出來的力度才會足夠，我細細粒，要做一個靈活嘅小辣椒，發揮自己長處！」
兩年前跟楊盼盼 (左) 學醒神操，之後就開始學打拳。(東星娛樂)
想做打女。(受訪者提供)
入行兩年來，不少人對Amber比較有印象的反而是她與郭子豪的戀情。 Amber表示作為藝人，「最想大家專注我嘅幕前工作，希望留番多啲空間。我知道自己而家作品唔多，希望劇集出街後加深觀眾對我嘅認識，唔好只係記得2年前我選港姐嘅時候。」
郭子豪於7月公開承認與Amber的戀情。(汪明荃IG)
Amber當時冧爆大讚男友Sweet。(東星娛樂)
2018年港姐三甲。左起亞軍鄧卓殷、冠軍陳曉華、季軍丁子田。(東星娛樂)
「小辣椒」對未來充滿期盼。(《晴報》楊嘉傑攝)
【踩過界II】鄧卓殷拍跳樓戲引真．救護員到場 丁子朗唔做學生演賤男醫生有驚喜 【下一頁】
撰文：林惠珊
攝影：楊嘉傑
髮型：Haysses Ip @ HAiR
化妝：Kineks Ho
服裝：Suncoo