25歲的鄧卓殷（Amber）在新劇《踩過界II》一出場，就來一場震撼的跳樓自殺戲，她飾演的陳詩涵背住單親媽媽（楊卓娜飾）做援交少女，可惜被欺騙感情，被男友柯宇霖（丁子朗飾）公開侮辱兼網絡欺凌。港姐出身的她，雖然戲份及對白不算多，但角色要化超淡粧加上複雜的內心戲，對於這位拍劇初哥已是很大的挑戰。
Amber今次是第二次拍劇，陳詩涵這個角色的設定與現實的她反差較大，因此具一定挑戰性。「呢個角色一出場，多數係喊、鬧交為主。自己比較樂觀，但拍劇要勁喊，怕情感發揮未到位。」她自言是眼淺的人，「不過好少喺人哋面前眼淺，我係幾容易因為小事感動想喊，但係人前會表現得好堅強。咁多年只喺學校喊過一次，所以今次角色要好強烈表達情緒，展現到自己另一面。」
拍劇兼讀建築碩士
她直認拍攝前十分緊張，為角色做了不少準備工夫，「做定資料搜集，搵下援交少女內心世界係點樣，同埋點解佢哋要咁做。」提到最難忘的場面，她指是跳樓跌墮在蔡思貝車頂那一幕，「同場的張振朗和蔡思貝好細心教我如何演得較逼真、動作姿勢同點樣吐血，張振朗更親身示範。」
Amber在香港中學文憑試中考獲4科「5**」，之後於香港大學修讀建築系學士，絕對是高材生一名，不過Amber沒有選擇做建築師，反而跳出舒適圈參加18年《香港小姐競選》，最終獲得亞軍及「最上鏡小姐」而入行。Amber忙於幕前工作之餘，仍然繼續學業，現正修讀建築系碩士課程，預料明年五、六月畢業。「建築碩士係選港姐前已經報讀，呢個目標係之前訂立，我好想完成。全職學生同藝人都要用盡100%精力去做。我讀書期間都繼續拍劇和做節目，又去演藝上課程，用盡時間增值自己。」
跟「師姐」朱千雪一樣好學不倦，又會否跟她一樣有轉行打算？Amber認為︰「其實讀建築唔一定要做建築師，我覺得係思想訓練。建築系多數係每人設計一個project，有好多問題需要自己解決。讀書過程係集中點樣解決問題，唔係好死板。」她又表示，建築師同演員其實好相似，「設計一幢樓然後諗點樣實踐，就好似演員為一個角色設計背後的故事，因為有時編劇未必寫得好仔細，演員都要自己畀心機去設定。讀建築無話框死一定要做建築，反而係擴闊咗自己思路。」
學功夫練拳做打女
入行後，Amber慢慢愛上演員的工作，「未入行前，覺得演員係一個好特別的角色，可以嘗試不同職業，經歷好多人生未必經歷到的事，不同角色令我對演員這職業產生更多興趣。」提到未來想挑戰的角色，她說正跟武打女星楊盼盼學習功夫及打拳，希望有一日演打女角色，可以派上用場。她指盼盼姐叫她要拋低女仔形象，打出來的力度才會足夠︰「佢話『你細細粒，要做一個靈活嘅小辣椒，要應用自己嘅長處。』」
服裝︰Suncoo
化粧︰Kineks Ho
髮型︰Haysses Ip @ HAiR
撰文︰林惠珊
編輯︰黃寶恩
美術︰梁政敏
攝影︰楊嘉傑
▲鄧卓殷在《踩過界II》扮演醫生柯宇霖 （丁子朗飾）的「兼職女友」，為演好角色，事前做了不少資料搜集。
▲劇中，鄧卓殷飾演的中學女生受到網絡欺凌，因而跳樓自殺，角色有不少內心戲。
▲18年參選港姐獲得亞軍，跟冠軍陳曉華（左）結成好友。
