娛樂圈美女如雲,要突圍而出真係談何容易?日前有位網民喺討論區發起討論,問大家心目中有冇一個細個唔識欣賞,但大個睇番先發現靚嘅女明星,而且仲唔係「霎眼嬌」,到而家睇番仍然覺得「襟睇」。
呢位90後嘅Post主拋磚引玉,指自己以前小學睇電視、報紙見到陳文媛(Bobo)唔覺得佢靚,係大個之後先識欣賞,大讚Bobo嘅五官同輪廓都好靚,而且皮膚白裏透紅,散發住氣質!
(東星娛樂)
呢個Post引起唔少網民加入熱烈討論,除咗Post主講嘅陳文媛之外,好多網民都認同王菲靚女,大讚佢眉目如畫:「有啲掛住王靖雯(王菲出道早期藝名)時期長頭髮,好高貴。仲有《重慶森林》(電影)我覺得後生嘅佢有種英氣,眉目同面形都好Sharp, 但發呆嗰陣會有種天真爛漫嘅感覺!」
(《重慶森林》劇照)
而李綺紅亦獲網民一致大讚,指佢係樣靚之外再加上鬼妹仔性格非常可愛。
(網上圖片)
而仲喺圈中活躍嘅代表就有人妻陳自瑤(Yoyo),大家由佢出道拍《四葉草》睇到而家,當年Yoyo非常青澀,青春氣息爆晒燈;而而家39歲嘅佢就充滿成熟韻味,而且生咗一個囡囡嘅佢身材仲比起做女嘅時候更加弗添!
陳自瑤(東星娛樂)
生咗兩個嘅楊思琦身形同樣都Keep得好好,一啲都唔似42歲,仲有少少少女味!
楊思琦(東星娛樂)
一出道就憑住可愛面孔爆紅嘅葉蘊儀網民都勁Like!即使到而家佢都佢都依然Keep住「娃娃臉」,近年佢以視覺藝術家身分喺香港活動,仲積極參與環保活動,真係由內靚到外!
葉蘊儀(網上圖片)
選港姐入行嘅張可頤都俾大家盛讚!仲讚佢扮咩似咩,除咗《難兄難弟》嘅寶珠姐之外,覺得佢《楚漢驕雄》古裝Look都好好睇!而且有一種特別嘅女強人「霸氣」咁話!
張可頤(網上圖片)
南加州大學機械工程碩士、NASA見習工程師嘅「高學歷」港姐冠軍郭藹明拍咗唔係好多作品就被劉青雲「私有化」,可能好多比較年輕嘅朋友都冇乜睇佢嘅作品。
郭藹明(網上圖片)
有網民指自己細個嗰陣覺得女人係長髮先靚,但大個覺得蒙嘉慧短髮都好靚,大讚佢英氣同有氣質,令人有一種想一望再望嘅感覺!
蒙嘉慧(東星娛樂)
而最多網民讚同嘅係有「大美人」之稱嘅林青霞,有位網民指佢認識林青霞係因為細個睇《東方不敗》重播:「覺得(林青霞)又老又成個男人咁,大個睇番佢30歲前先知佢有幾靚!」不過大家對佢呢番說話都唔係全然認同,指林青霞去到而家66歲仍然都係靚,而且仲比年輕嘅時候多咗幾分優雅嘅感覺。
林青霞(網上圖片)