【聲明】港生活網站並無進行電話推廣活動

大女識唱《對你愛不完》 郭富城:一聽即刻冧晒

發佈時間: 2020/11/24

天王郭富城(城城)昨日以代言人身份出席銀行活動,城城一提兩個寶貝女Chantelle和Charlotte,即變身暖爸,開心透露囡囡竟識唱他的經典名曲《對你愛不完》,令他冧到爆之餘,又承諾為女兒做好榜樣。

郭富城昨日在記者會上,欣賞由他演出的最新銀行廣告,他笑言本想借出自己收藏的限量版跑車拍廣告:「呢部車全球得十部,不過拍攝前大會借到另一部,所以我就只出動自己訂製嘅私伙頭盔。」近日疫情反覆,幼稚園停課,城城表示已安排家庭老師教導女兒:「個女學緊廣東話,因為喺屋企得我同佢講廣東話,所以請咗老師教廣東話同英文,太太都喺旁邊聽。」

城城拍攝的銀行廣告中,其中一條短片主題為父女情,但他沒有帶兩個女兒參演。問他日後會否讓囡囡出鏡?他說:「囡囡年紀太細,不過家姐幾有天份,與同齡小朋友相比,佢算活躍又鍾意表演。」他笑言可能大女看過他表演,所以對演藝有興趣:「早兩日我揸車載大女同媽咪、婆婆,估唔到大女突然唱《對你愛不完》,聽到佢唱真係好冧。呢首仲係我歌手生涯第一首快歌,好似延續我嘅唱歌事業,希望可以繼續做囡囡嘅好榜樣。」

理財重任交小美

提到理財心得,城城視自己的名車收藏為投資,問他的財政大權是否交給太太?他笑說:「我放心交畀公司會計同經理人小美打理,一直盤數都唔錯,我專心做藝人尋求突破。當年第一份人工就已經放入銀行,其實我都係打工一族,最重要係有目標、有計劃咁運用。」

撰文︰Pauline

攝影︰林良明

編輯:李潔盈

美術:梁政敏

大女識唱《對你愛不完》 郭富城:一聽即刻冧晒

郭富城讚大女Chantelle有表演天份。(資料圖片)