【聲明】港生活網站並無進行電話推廣活動

4個月無見家人 「失業」陳國坤返港陪囝囝學琴

發佈時間: 2020/11/25

陳國坤(小龍)前晚出席主演的新片《拳道》首映禮,剛從內地回港、並完成隔離的小龍,坦言已四個月沒見寶貝仔陳真,他堅持盡量抽時間陪伴兒子,化身「伴讀書童」,陪兒子由零開始學鋼琴,希望培養他的音樂細胞。

《拳道》演員陳國坤、敖嘉年及郭奕芯等前晚齊集首映禮,雖然近日疫情反彈,不過場內擠滿人群,演員更一同除口罩合照,防疫意識不足。小龍搞笑稱自己最近「失業」:「我都係啱啱返到香港,完成咗隔離,我已經四個幾月無返屋企,下個月就返內地開工。」問兒子陳真會否不認得爸爸?小龍笑說:「我化咗灰個仔都認得我,個仔見到我係開心,因為媽咪(黃依汶)管教嚴厲,媽咪唔畀佢做嘅嘢我都畀,例如食朱古力咁。」

小龍表示平日負責陪兒子玩:「個仔知我好錫佢,會陪佢打雙節棍、踢沙包、練拳,佢兩歲已經開始學。不過佢媽咪鍾意佢學琴,為咗個仔肯學,我都陪佢一齊學。我本身只識彈結他,鋼琴真係由零開始,最難係要學習樂理,但為個仔無所謂。」同場的敖嘉年重返無綫拍新劇《欺詐劇團》,與鄭丹瑞及蔣家旻等合作,他為了配合導演角色而留鬚。敖嘉年說:「我同蔣家旻有感情綫,會叫監製寫多啲親熱戲。」

郭奕芯自爆同圈中人分手

另外,郭奕芯前日25歲生日,獲大會送上生日蛋糕慶祝,她笑言25歲後不會再公開年齡。目前單身的她說:「我想搵個好男人,不過好難,要睇定啲先,要時間慢慢搵。」她自言上一段感情在兩年前結束,言談間更不慎自爆舊愛是圈中人,但她堅拒透露對方身份:「唔想講咁多,好似幫人宣傳咁。下次搵男友,係咪圈中人無所謂,反而真誠好緊要,要搵個真心嘅男仔好難。」

採訪︰Pauline

編輯:李潔盈

美術:梁政敏

4個月無見家人 「失業」陳國坤返港陪囝囝學琴

郭奕芯曾受情傷,慨嘆好男人難找。