出席胞兄婚禮變簽唱會 許廷鏗被父親「擺上枱」勁尷尬

許廷鏗（Alfred）胞兄許永鏗日前迎娶拍拖四年的女友裴殷（A.Lin），Alfred在婚宴上獻唱親自創作的歌曲送給兄嫂，十分有心思。Alfred笑言當晚他連番被親友催婚外，許爸爸上台致辭時竟將他「擺上枱」，令Alfred好笑又尷尬。

許廷鏗與老友鄭欣宜昨日錄影香港開電視新節目《30分鐘大放餸》，提到胞兄許永鏗娶老婆，Alfred在婚宴上演繹親自創作送給兄嫂的新歌外，更拍了MV在現場播放，他笑說：「我有送禮金嘅，阿哥完全唔知我寫歌畀佢。」欣宜聞言即要求Alfred寫歌給她，更不惜主動向Alfred「求婚」換歌，場面搞笑。

提到大嫂裴殷曾是圈中人，Alfred大讚阿嫂與許家相處非常融洽：「阿嫂同我同年，所以無隔膜，佢好顧家，好識俘虜屋企人個胃。」Alfred自言在婚宴上不停為親友簽名及合照，十足迷你簽唱會；他更被親友瘋狂催婚：「當然有（催婚），我惟有回應『快喇，快喇』。」他笑言婚宴上最驚訝一幕，竟是榮升老爺的許爸爸致辭一刻：「我估唔到阿爸喺台上不停讚我，搞到我勁尷尬，佢仲話多得阿哥帶挈，我先可以做歌手，咁呢個都係事實，咁多年嚟阿哥都好鼓勵我唱歌。」

欣宜讚王祖藍囡囡得意

Alfred與欣宜昨日在節目中比拼廚藝，二人更帶備私伙廚具，相當認真。Alfred炮製西班牙海鮮飯及蛋餅，欣宜則整意式焗雞及三層蛋糕。Alfred說：「前排我人生第一次煮餐飯畀屋企人食，佢哋都讚我有天份。」另外，早前王祖藍在社交網分享女兒食雪糕的影片，只見小朋友食得十分滋味，有網民留言指她貌似欣宜。欣宜大笑說：「我覺得祖藍囡囡得意過我，我明白細個時點解長輩咁鍾意睇我食嘢，依家見到小朋友食嘢，真係好過癮。」

採訪︰Pauline

攝影︰林良明

編輯：李潔盈

美術：梁政敏