思鄉病發 開 Live 好友齊捧場 容祖兒爆喊︰唔好再講掛住我

已逗留內地數月的容祖兒（Joey），昨日凌晨在IG開Live宣傳新廣東歌《東京人壽》，多位圈中好友包括蔡卓妍、黃偉文等也在網上「現身」向Joey問好，張敬軒（軒仔）更與她連綫見面，想不到觸發思鄉病發的Joey喊住稱︰「好感動呀，你哋唔好再講掛住我喇！」

今年中開始北上賺人仔的Joey，數個月內先後參與國慶及雙11等多個大型晚會，並為多個綜藝節目擔任嘉賓，暫時也未有歸期返港見家人及好友。日前，Joey的好姊妹蔡卓妍開生日睡衣派對，她也無法親身賀老友。

Joey的新廣東歌《東京人壽》MV於前晚在YouTube發布，素顏的她昨日凌晨約12時突發在IG開Live與fans傾偈、唱歌，全程約30分鐘，她戲言跑步時「黐起條根」就想開IG Live介紹新歌，結果吸引逾6,000多位fans捧場。除了容媽媽「現身」睇Live，好友蔡卓妍、關智斌、經理人霍汶希、黃偉文甚至剛完成第四場紅館騷的軒仔，亦有觀看直播，可謂星光熠熠。

軒仔穿浴袍照撑場

一班圈中好友及歌迷都異口同聲，掛念一直在內地工作的Joey，令她感動得雙眼通紅兼要以手遮面，更忍不住落淚︰「好感動、好開心，全部（朋友）都喺度！」Joey邊喊邊抹眼淚稱︰「你哋唔好再講掛住我喇！我明明只係想開Live唱首新歌畀大家聽！」

Joey除即場唱新歌冧fans外，又嘗試與軒仔連綫傾偈，豈料鏡頭一開，軒仔僅穿浴袍兼頭髮濕漉漉未乾，他邊手抓住浴袍，邊怕醜鬧Joey︰「你快啲唱咗歌先啦，我喺沖涼房呀黐綫！」逗得Joey哈哈大笑，便立刻中斷與軒仔連綫，她更忍不住稱︰「好彩佢（軒仔）有着衫！」其後Joey叮囑歌迷支持其新歌，並期待下次再次開Live。

撰文︰Steven

編輯︰黃寶恩

美術︰Simon