馬國明與黃智雯在劇集《使徒行者3》中有感情綫，在戲外則各自有感情穩定的另一半。提到二人經常被催婚，黃智雯昨日坦言其圈外男友是適合的結婚對象；至於正熱戀湯洛雯（靚湯）的馬明，則揚言若結婚定必通知大家。
馬國明、黃智雯、張振朗及蔡思貝等昨日宣傳《使徒行者3》，提到蕭正楠因與新冠肺炎確診者有接觸，現正接受強制隔離，馬明及黃智雯在台慶夜曾與蕭正楠接觸，二人表示在台慶翌日已接受檢測，結果呈陰性。馬明說：「我同阿蕭有電話聯絡，佢同確診者其實接觸唔多，所以確診機會應該唔大，不過隔離下都好，相信佢14日後可以出返嚟。」
提到袁偉豪新婚，馬明及黃智雯都戥對方開心，問他們可有受甜蜜氣氛影響而有結婚衝動？馬明立即「交波」給黃智雯，指女方與圈外男友感情穩定。黃智雯笑笑口說：「呢排隔日就被人問我幾時結婚，我哋係好穩定，但都要時間準備（結婚）。大家仲心急過我，但大佬馬明唔結婚，我都唔敢結住！」馬明即回敬說：「你等我就死啦，如果到呢一步（結婚），一定會公開同大家講嘅。」
為球王離世感可惜
近日盛傳馬明新歡湯洛雯與舊愛黃心穎姊妹情盡，兩女取消關注對方IG，馬明自言「無留意」：「要問番佢哋有無聯絡。（有傳無綫跟黃心穎解約？）我無聽過呢個傳聞。（如解約後心穎重新發展是好事？）要問番本人，佢將來想喺邊度發展，都係問番佢自己。」
另外，提到阿根廷一代球王馬勒當拿日前心臟病發逝世，熱愛足球的馬明表示十分可惜，自言最深刻的是1986年阿根廷對英格蘭「上帝之手」事件：「雖然我捧英格蘭，馬勒當拿第一個入球有手球之嫌，但佢入嘅第二球，足以證明佢一代球王嘅地位。」
採訪︰Pauline
攝影︰林良明
編輯：李潔盈
美術：梁政敏