初戀都是中學Puppy Love 張秀文難忘回憶：只拖過一次手

初戀，不論sweet到漏，還是慘痛收場，總之令人回味的。張秀文、朱敏瀚、黃智雯和黎諾懿回憶那些年的初戀，各有不同滋味湧上心頭，但同樣都是忘不了。

「咪神」張秀文（Sammi）的初戀發生在中學時期，卻是短短不足一個月的puppy love，她說︰「嗰年大約15、16歲，要應付會考，對象係同級同學，佢算係壞學生，成績差，但人幾醒目，不過留班囉！我哋拍拖一個月都無，無錫過，連攬都無，只係喺商場拖過一次手，第一次亦係最後一次。」她說拍拖時雙方都好認真，她為男友仔花心思親手整禮物，對方亦送過一對情侶手鐲，回想起來仍覺得很sweet。

既然甜蜜蜜，後來為何無疾而終？Sammi嘆稱︰「我想專心應付會考，始終學業為重，唔想拍拖，但又唔覺意開始咗，最後我主動提出分手。」她與初戀男友讀同一間中學，雖然分手，仍偶有碰到，她坦言︰「見到有少少尷尬，分手後無再聯絡。（會唔會覺得玩人呀？）我初戀啫，未必係佢嘅初戀嘛，我好認真㗎，只係一齊嘅時候未諗清楚。」

黎諾懿 送自摺幸運星

已婚的黎諾懿與太太李潔瑩育有兒子「小春雞」，一家三口生活愉快，提到初戀，諾懿笑言︰「第一段戀情發生喺中學時候，個女仔好靚，其實同我拍拖嘅全部女仔都好靚。」

小時家境清貧的諾懿，慶幸遇到的女仔都並非大花筒，「啲女仔都會遷就我，行下公園同埋沙灘，去啲使錢較少嘅地方。以前拍拖真係好開心同埋純真，我會送小飾物同摺幸運星畀女仔嘅。第一段戀情維持咗一、兩年，其實次次拍拖我都係畀人飛，可能我個人好重情，其實每段感情都係經歷，會令人成長。以前拍拖好膚淺，除咗靚女，都要個女仔身材好，但時間耐咗就要睇大家夾唔夾。」

朱敏瀚 打排球結情緣

朱敏瀚的初戀對象是讀中學時的學妹，提起這段初戀，雖然稱不上浪漫，卻很回味。他說︰「當時加入學生會，藉住打排球認識佢，感情維持咗一、兩年。其實叫得puppy love，都係大家仲未成長，不過睇住大家一齊成長，都好開心嘅。」兩人最終分開，朱敏瀚稱主因是大家修讀的學科不同，身邊朋友又不一樣，漸漸愈走愈遠。

提到初戀的難忘事，朱敏瀚說︰「主要一齊嘅場合係喺學校，事關我有家人接送返學放學，基本上無乜私人時間。」他從未與女友單獨睇戲，每次睇戲都是與一班朋友，不過兩人不太介意有否獨處時間，總之一齊就很開心。

黃智雯 運動男最吸引

黃智雯在圈中數一數二跳舞出眾，原來她一直對「跳舞男」有好感，初戀亦是被男方的運動型style及舞姿所吸引。她憶述這段pure love︰「對方係中學同學，雖然係人生第一次對異性有感覺，但自己對感情向來好認真，唔係拖下手就當拍拖。（邊方面吸引你？）我唔係單憑外表就鍾意人，當然靚仔更好，哈哈！」

她續說：「我鍾意有才華嘅男仔，佢打籃球叻而吸引到我。佢係運動型男仔，跳舞都好叻，我哋發展咗只係年幾，之後都專注學業而分開，大家傾下偈，笑下都好開心，係一種純純的愛，就算一齊食麥記都好開心，唔會乜都計算，好pure。」

採訪︰Pauline

編輯：黃寶恩

美術：梁政敏