【聲明】港生活網站並無進行電話推廣活動

自爆與8歲囡囡勁Friend 王浩信:個女叫我做兄弟

發佈時間: 2020/11/30

陳豪、王浩信及鄭丹瑞(旦哥)早前演出劇集《非凡三俠》,三人最近接受《Tiger's Talk》主持伍詠薇和林盛斌(Bob)訪問,大談仔女經。平日甚少談及女兒的王浩信,自爆兩父女關係極佳,一起打機更會傾心事,相當老友。

王浩信近年與太太陳自瑤不時傳出婚變,浩信更甚少提到現年八歲的女兒王靖喬。不過浩信接受訪問時,罕有大談囡囡,更不時流露慈父笑容:「我同個女會傾心事,有時拍戲做咗啲乜都會同佢講;放假又會一齊做運動、睇書、打機,佢學識游水同踩單車,都係我親自教佢,有時佢直情叫我做bro(兄弟)。」林盛斌聞言非常羨慕:「屋企四個小朋友成日叫錯我做『媽咪』!」陳豪亦說:「你(Bob)都好吖,我啲小朋友有時口快快,叫錯我做『姐姐』!」

陳豪三年抱三屬意外

陳豪與太太陳茵媺三年抱三,連「多仔公」Bob都甘拜下風,不過陳豪竟自爆純屬「意外」,他面紅紅說:「唔係刻意,不過一行埋就有……」提到大仔剛升小一,他說:「阿仔讀書寫字,特別係中文字就由我教,因為屋企得我一個識中文,起碼要阿仔識寫自己個名。」

王浩信及陳豪的仔女年紀尚小,不過鄭丹瑞的兩個囡囡快將30歲,旦哥向兩位爸爸預告說:「你要預個女15、16歲就去蘭桂坊玩。」開通的旦哥鼓勵細女學鋼管舞,甚至欣賞女兒表演:「但佢表演時突然扯開衫褲,只着T-back加bra top,我同老婆嚇咗一跳…當然我照畀佢玩,但唔會再去睇佢演出。」

問到將來女兒帶男友回家一刻能否接受?浩信說:「我想維持bro嘅關係,個女將來拍拖都唔好離我太遠,被人hurt完話我知,等我開解佢,唔好自己匿埋。由細細個開始建立友誼,可能將來佢去蘭桂坊會帶埋我呢?」

撰文︰Pauline

編輯:李潔盈

美術:梁政敏

自爆與8歲囡囡勁Friend 王浩信:個女叫我做兄弟

王浩信女兒王靖喬眉清目秀,是個小美人。(資料圖片)