【聲明】港生活網站並無進行電話推廣活動

惡形惡相鄭家生 好人難做

發佈時間: 2020/12/01

鄭家生入行41年,每次他在電影或電視劇中必定飾演黑幫社團大佬、殺手或者賊人,但私下的他卻是一位不酒不賭的慈父,跟兩個兒子的關係如朋友一樣。64歲的鄭家生不求名利,只盼望在工作上跟老友聚舊見面過日辰,閒時跟太太拍拖去旅行,享受半退休的生活。

鄭家生外表兇神惡煞,經常被安排演反派角色,而且非常「入屋」,香港人對他都非常熟悉。鄭家生小時候在舅父的戲班出身,12、13歲就跟元彪、元寶等著名武打演員一齊成長,他說︰「細個聽到有錢搵就去,習武無話辛唔辛苦,有工開就有錢,所以乜都死練爛練。」

做過狄龍爾冬陞替身

家中有九兄弟姊妹,家生排行第四,大家都會自動自覺出外工作養家,從不埋怨,鄭家生就選擇加入龍虎武師和替身的行列。他說︰「雖然做龍虎武師感覺好粗聲粗氣,不過我哋好識得尊師重道。以前年紀大嘅前輩同導演,我哋都會好尊敬,唔會好似依家啲後生咁,連招呼都唔會打。做龍虎武師最重要係安全,以前連攝個墊都要匿埋唔好畀人見到,因為前輩會話︰『你咁錫身,唔想撈呀?』(受傷?)傷一定有,背脊位好多骨頭都凸晒出嚟。尤其係成龍同洪金寶年代嘅電影,條威也左纏右纏打圈,纏到亂晒再被佢哋一踢,反應都嚟唔切就被威也一拉即落地。」

鄭家生曾經為爾冬陞、狄龍等做替身,後來獲賞識走到幕前演戲,不過初時承受的壓力非常大,他說︰「三句對白畀我講,真係會好緊張,我寧願打十幾招,好彩後來慢慢適應。」入行多年,他自問沒有代表作,他說︰「代表作真係諗唔到,電影同電視劇都拍好多,只要劇本拎埋嚟我就演,做好個角色就足夠。(演極都係反派?)演咗幾十年都習慣喇,無話厭唔厭,幾十年來做過幾百個角色,只係黑社會就最經常做。我都想做好人,不過全部導演同監製都唔搵我做好人,一有黑社會角色就諗起鄭家生。」

在電影業蓬勃的年代,鄭家生曾獲邀離開無綫往外闖,但他考慮到當時兩個兒子仍在求學階段,加上剛置業不久,便決定留守無綫循龍虎武師、替身和演員三綫發展。問到哪位演員的動作戲令他最印象深刻,鄭家生不加思索即答︰「劉德華,華仔真係犀利,見住佢訓練班出嚟,學嘢好快手,佢練得好,記性又好。」

現年64歲的鄭家生早前在劇集《殺手》的動作場面依然親身上陣,他說︰「依家係半退休狀態,我唔係十八廿二,仲打會好吃力,上咗年紀體力都變差,劇中同歐瑞偉對打,打到我嗌救命。兩個仔已經出晒身,我只係久唔久開工,見下老朋友,放假就同老婆拍拖去旅行。」鄭家生提到家庭時一臉幸福,雖然惡形惡相,但私底下卻是愛妻號兼慈父,他說︰「個個都愛屋企,我好隨和,對兩個仔唔惡,我嘅立場係你讀到書就讀,讀唔到就唔好留喺屋企,我唔養閒人,你自己去搵嘢做!依家兩個仔都有工作,自己搞掂自己,責任已經唔喺我度。(等湊孫?)咪搞,玩下就得。」

拒絕幫兩個兒子置業

鄭家生兩個兒子分別35歲和31歲,分別做汽車買賣和做生意,父子感情甚好,但他反對為子女置業,他說︰「家長買埋樓畀佢,又留嚿錢畀佢,咁佢咪廢人一個?當年我搏晒命做到嗌救命先有層樓,依家佢坐喺度等就有層樓?我養大你就自己搞掂啦,唔好諗住有身家畀你,層樓分分鐘將來我賣埋用嚟自己養老仲好。」他認為到了一定年紀,最重要身體健康,所以每日都會落街跑步,就算疫情下仍風雨不改,他希望可多活20年或以上,盡享福樂。

撰文:楊安莉

攝影:王華婷

編輯:黃寶恩

美術:梁政敏

惡形惡相鄭家生 好人難做

鄭家生在熱播的《使徒行者3》再次演黑社會角色,飾演金青社話事人大聖爺。(網上截圖)

惡形惡相鄭家生 好人難做

《殺手》中,與歐瑞偉的對打場面十分精采,鄭家生笑言年紀大,所有動作只能盡力而已,不能勉強。(FB圖片)

惡形惡相鄭家生 好人難做

《殺手》中,與歐瑞偉的對打場面十分精采,鄭家生笑言年紀大,所有動作只能盡力而已,不能勉強。(FB圖片)

惡形惡相鄭家生 好人難做

去年《2019亞洲最具影響力盛典》中,與多位資深演員如陳榮峻(右一)及剛離世的曾偉權(左三)一齊得獎,而鄭家生(左四)獲得「最具影響力專業演員貢獻大獎」。(FB圖片)