太古地產「白色聖誕專車」 播歌籌款社區送暖

聖誕節假期快到，黛安收到風，今年太古地產嘅團隊除咗已送出超過$40萬聖誕禮物畀唔同社區群體，最近又推出「白色聖誕專車」，由即日起到下星期五（18日），喺指定日子去灣仔星街小區同東涌東薈城，同大家一齊慶祝聖誕！公關姊妹話，聖誕車會喺午飯同傍晚時段去到指定地點，為社區送上源源不絕嘅聖誕音樂；團隊亦會喺車上錄製6個各長半個鐘嘅音樂節目，並於指定日子嘅晚上9時，喺KKBOX同太古地產嘅fb專頁播放，期間每收到1個Like，太古地產就會捐$10畀註冊慈善機構「愛心聖誕大行動」㖭！

黛安知道，呢6集節目內容分別涉及6個唔同社區群體，例如基層家庭、上班族、護理人員同少數族裔等，節目入面會透過著名歌手同本地年輕音樂人嘅表演講佢哋嘅故事，大家記得記住時間去湊湊熱鬧！