【聲明】港生活網站並無進行電話推廣活動

傳睇死初出道周星馳紅唔起 鄭裕玲呼冤︰有人加鹽加醋

發佈時間: 2020/12/14

鄭裕玲(Do姐)與周星馳的不和傳聞,一直是娛圈都市傳說,有指Do姐在星爺未紅時曾寸爆對方做不成主角,二人因而結怨。Do姐日前在商台節目《口水多過浪花》重提事件,澄清絕無睇死星爺:「我真心覺得佢係好好,可能有人聽到我哋對話就加鹽加醋!」

周星馳1987年拍無綫劇集《生命之旅》時,仍是寂寂無聞的他,與當時已是當紅花旦的鄭裕玲合作。有傳星爺曾問Do姐覺得他會不會走紅,誰知Do姐爆出一句:「路人甲永遠無可能做主角。」有指他們因而勢成水火,即使星爺後來在影圈走紅,貴為影后的Do姐也有「鄭九組」之稱,但二人從未在電影中演過對手戲。

事隔多年,Do姐近日在其電台節目開腔澄清︰「星爺主持《430穿梭機》嗰陣我已好欣賞佢,佢好得意,會搞喊細路。好嘢總有人發掘,於是調咗佢嚟戲劇組,嚟咗我哋部劇集(《生命之旅》),佢都會正正經經同我傾下偈,之後有是非出咗嚟,呢件心事我要平反喇!」她憶述說:「有次等埋位,佢(星爺)問我做演員有無前途,我當時已經係阿姐嚟,可能周圍有人聽到我哋對話就加鹽加醋,我記得我係讚佢好有潛質,畀心機做。」

呻是非纏繞多年

Do姐勞氣指事件傳出後,竟變成她狂踩星爺:「我真心覺得佢好好,點知當時啲八卦周刊話我踩佢唔掂,直到依家,都仲有報道話我曾經咁講佢!」Do姐估計是當時現場的臨記或工作人員加鹽加醋所致,她又強調與星爺關係良好,從無芥蒂:「有次TVB慈善活動請星爺做嘉賓,佢同監製講本來唔嚟,但因為主持係我,佢話好耐無見,當入嚟同Do姐傾下偈!如果我咁差嘅,佢會唔會嚟呢?」Do姐坦言對傳聞「堅嬲」︰「因為我的確無咁樣講過!」不少網友力撑Do姐,相信Do姐對傳聞忍無可忍,才會發聲。

撰文︰Steven

編輯︰李潔盈

美術︰梁政敏

傳睇死初出道周星馳紅唔起 鄭裕玲呼冤︰有人加鹽加醋

Do姐(左二)自爆星爺(右三)為了跟她聚舊,才答應於08年出席無綫慈善騷。(資料圖片)

傳睇死初出道周星馳紅唔起 鄭裕玲呼冤︰有人加鹽加醋

甚少在港露面的星爺(中),上月現身高等法院,與舊愛于文鳳對簿公堂。(資料圖片)

傳睇死初出道周星馳紅唔起 鄭裕玲呼冤︰有人加鹽加醋

Do姐早前在電台訪問男團MIRROR成員Jer(左)及Anson Lo,對新人照顧有加。(FB圖片)